Zaharova akuzon Kurtin dhe Perëndimin: "Terror sistematik ndaj serbëve në Kosovë"

Rusia hedh sërish akuza të rënda mbi situatën në Kosovë. Zëdhënësja e Ministrisë së Punëve të Jashtme të Rusisë, Marija Zaharova, deklaroi se në Kosovë po forcohet një "terror sistematik" ndaj serbëve dhe akuzoi vendet perëndimore se me mosveprimin e tyre nxisin një "pastrim etnik".

Në një koment të publikuar nga Ambasada e Rusisë në Serbi, Zaharova pretendoi se situata dëshmon "forcimin e një terrori të vetëdijshëm e sistematik ndaj popullsisë vendase serbe". Sipas saj, kjo bëhet nga "organet e përkohshme të vetëqeverisjes në Prishtinë", ndërsa "shtypja e njerëzve mbi bazë etnike po ndodh me miratimin e heshtur të pranisë ndërkombëtare të vendosur nën patronazhin e NATO-s, BE-së dhe OKB-së".

Zaharova e cilësoi pozitën e serbëve në Kosovë si "vërtet katastrofike" dhe u shpreh se roli i kryeministrit të Kosovës, Albin Kurti, "nuk është befasues", duke e akuzuar se "kredoja e tij politike mbështetet mbi një serbofobi fanatike, të pakontrolluar".

Ndër pretendimet e saj, zëdhënësja ruse tha se serbët "detyrohen të braktisin shtëpitë e tyre" dhe se "'drejtësia' kosovaro-shqiptare fabrikon masivisht procese penale". Ajo iu referua në veçanti shembjes së objekteve në korrik në zonën e liqenit të Gazivodës: "Duke anashkaluar procedurat e vendosura shemben pronat serbe, siç ishte rasti i shembjes masive të ndërtesave të kryer në korrik në zonën e liqenit të Gazivodës".

Zaharova kritikoi gjithashtu vendimin e KFOR-it — kontingjentit shumëkombësh të vendosur në bazë të Rezolutës 1244 të Këshillit të Sigurimit të OKB-së — për të reduktuar praninë e njësive të tij në urën mbi lumin Ibër në Mitrovicë dhe në rrethinat e manastirit ortodoks të Deçanit. Sipas saj, ushtarët e KFOR-it në ato lokacione janë zëvendësuar pjesërisht nga pjesëtarë të policisë së Kosovës, çka, siç tha, "kërcënon me rritje të tensioneve ndëretnike".

Për politikën e Bashkimit Evropian, Zaharova pretendoi se "Brukseli ka sabotuar haptazi zbatimin e marrëveshjeve të vitit 2013 dhe 2015 për themelimin e Asociacionit të komunave serbe", ndërkohë që, sipas saj, kërkon nga Beogradi të zbatojë "marrëveshjet" e vitit 2023 me Prishtinën "që askush nuk i ka nënshkruar".

Zëdhënësja ruse e quajti të papranueshëm largimin e pjesëtarëve të KFOR-it, duke insistuar se kontingjenti "duhet të vazhdojë t'i përmbushë plotësisht detyrimet e ngarkuara, pa përfshirjen e sigurimtarëve kosovaro-shqiptarë". Ajo i kërkoi Misionit të OKB-së në Kosovë (UNMIK) të merret me detyrat e mandatit të vet dhe u bëri thirrje "të gjitha strukturave ndërkombëtare të marrin masa gjithëpërfshirëse për të parandaluar një katastrofë humanitare".

Akuzat e Moskës për një "terror sistematik" dhe "pastrim etnik" në Kosovë janë hedhur poshtë vazhdimisht nga institucionet e Prishtinës dhe nga partnerët ndërkombëtarë. Deklaratat e Zaharovës përbëjnë qëndrimin zyrtar rus dhe nuk janë konstatime të pavarura të verifikuara.