Ylli Zalla mbetet në burg: mbrojtja betejë me gjykatën për armët "50-vjeçare"

Gjykata e Tiranës ka vendosur masën e sigurisë "arrest në burg" për Ylli Zallën, duke rrëzuar kërkesën e mbrojtjes për një trajtim më të butë. Prokuroria kishte kërkuar pikërisht qëndrimin e tij pas hekurave, ndërsa avokati i të dyshuarit u përpoq të bindte gjykatën se as personi, as vepra për të cilën akuzohet nuk paraqesin rrezikshmëri të veçantë.

"Ylli Zalla nuk paraqet asnjë rrezikshmëri të lartë si person dhe as veprat për të cilat akuzohet nuk paraqesin rrezikshmëri të veçantë", argumentoi mbrojtja para gjykatës.

Në thelb të linjës mbrojtëse qëndroi mënyra se si u gjetën armët dhe municionet. Sipas avokatit, ato ishin lënë pas dore në pjesën e pasme të banesës. "Së pari, armët dhe municionet e sekuestruara janë gjetur në pjesën e pasme të banesës, në ferra, pa asnjë rregull apo masë për ruajtjen e tyre dhe pa qenë të paprekura apo të ambalazhuara", tha ai.

Mbrojtja pretendoi gjithashtu se një pjesë e materialit shpërthyes nuk ishte funksional. "Së dyti, disa nga kapsollat detonatore nuk kanë qenë të afta të shkaktonin shpërthim, ndërsa disa bomba nuk kanë qenë të lidhura në mënyrën e duhur", u tha në seancë.

Avokati insistoi edhe te mosha e armëve dhe gjendja e kanabisit të gjetur. "Së treti, armët janë prodhime të vjetruara, rreth 50-vjeçare, të prodhimit kinez, të vitit 1982. Edhe sasia e kanabisit të sekuestruar ka qenë nën efektin e agjentëve atmosferikë, çka tregon mungesë të çdo lloj kujdesi nga ana e të arrestuarit", deklaroi ai.

Për sa i përket profilit të vetë të dyshuarit, mbrojtja e paraqiti atë si një person pa lidhje me krimin. "Në lidhje me rrezikshmërinë e personit, Ylli Zalla nuk paraqet asnjë rrezikshmëri, pasi nuk është i përfshirë në asnjë ngjarje kriminale dhe nuk ka të dhëna se materialet e sekuestruara në ferra, pas pjesës së oborrit, janë përdorur në ngjarje të tjera apo se ai vetë ka ndërmarrë veprime për shitjen e lëndëve narkotike", tha avokati.

Një tjetër shtyllë e argumentimit ishte rrethana e dorëzimit. Mbrojtja theksoi se, pavarësisht një operacioni me forca të shumta dhe dronë, Zalla nuk u kap, por u dorëzua me vullnetin e tij. "Në këtë drejtim, me interes të veçantë është fakti se Ylli Zalla është dorëzuar vetë. Është e vërtetë që policia është angazhuar me dron dhe me efektivë të shumtë, por, pavarësisht operacioneve të zhvilluara për kapjen e tij, nuk ka mundur ta arrestojë. I vetmi element që solli suksesin e operacionit ishte dëshira e Yllit Zalla për t'u dorëzuar dhe për të sqaruar pozicionin e tij", tha ai.

Sipas avokatit, dorëzimi u regjistrua edhe në pamje filmike. "Videot publike para shtëpisë së tij e tregojnë këtë. Madje, ai vetë ka thirrur me zë një person që i është dukur pjesë e forcave RENEA dhe i është prezantuar, duke u dorëzuar", shtoi mbrojtja.