Wesley Clark: Kanë kaluar 27 vjet, disa në gjykatë harruan frikën e represionit

Vera e vitit 1998, kolonat e njerëzve të dëbuar nga fshatrat dhe intelektualët e vrarë njësoj: këtë e nxjerr sërish në plan të parë Wesley Clark, ish-komandant i NATO-s në Evropë, i cili thotë se ajo që ndodhi në Kosovë në vitet 1997-1999 nuk duhet të harrohet nga bota.

Në një deklaratë për televizionin A2CNN, Clark ka folur edhe për ata që, sipas tij, e kanë lëshuar nga kujtesa represionin e Millosheviçit ndaj popullatës së Kosovës.

"Kanë kaluar 27 vjet dhe disa prej atyre që janë në gjykatë e kanë harruar frikën e represionit të Millosheviçit mbi njerëzit e Kosovës. Unë e mbaj mend shumë qartë, në verën e vitit 1998, kur mbi 400 000 njerëz u spastruan nga fshatrat e tyre, ushtria që bënte lëvizje speciale taktike dhe eliminonte intelektualët, avokatët, profesorët. Shkonin atje për të plaçkitur shtëpitë dhe për të kryer krime të tmerrshme kundër njerëzve", u shpreh Clark.

Ai e ka lidhur harresën me shtimin e krizave të reja ndërkombëtare, duke përmendur pushtimin rus në Ukrainë dhe zhvillimet në Lindjen e Mesme, por duke theksuar se rastet nuk barazohen mes tyre.

"Sigurisht, njerëzit rezistuan kundër kësaj, por ndoshta sot pas 27 vitesh, duke parë çfarë ndodh edhe me pushtimin rus në Ukrainë, atë çfarë ndodh në Lindjen e Mesme, njerëzit harrojnë. Por, nuk është e njëjta gjë. Nga 1997 deri në 1999, ata nuk duhet ta harrojnë sepse ne duhet të formësojmë civilizimin e ri, për ruajtjen e të drejtave të njeriut, për atë që ka bërë Amerika edhe me deklaratën që e ka nënshkruar, dhe këtë njerëzit nuk duhet ta harrojnë", shtoi ish-komandanti i NATO-s.

Clark nuk e ka saktësuar se për cilën gjykatë ka bërë vërejtjen e tij.