Vula e Konsullatës turke në dosje: gjyq në Prishtinë për leje qëndrimi të falsifikuara

Gjashtë vula, një armë, dy laptopë dhe 671 monedha metalike të dyshuara si të falsifikuara. Ky është thelbi i dosjes që ka arritur para Gjykatës Themelore në Prishtinë, ku shtetasi turk Murat Demirtepe u paraqit për herë të parë në procedurë penale.

Seanca u mbajt në Departamentin e Përgjithshëm, Divizioni Penal, para gjyqtarit Driton Berisha. Demirtepe përballet me akuzat për falsifikim të dokumenteve, falsifikim të parasë dhe mbajtje në pronësi, kontroll ose posedim të paautorizuar të armëve.

Rasti nisi nga dyshimet se në një zyrë ndërmjetësimi me emrin "Anatolia Express" përgatiteshin dokumente të falsifikuara për shtetas turq, të cilat dyshohet se përdoreshin gjatë aplikimit për leje të përkohshme qëndrimi në Kosovë. Demirtepe ishte arrestuar gjatë një operacioni policor në Prishtinë, bashkë me një shtetas tjetër turk, Ihsan Kiliç.

Hetimet i çuan policinë në tri lokacione të ndryshme. Aty u gjetën dhe u sekuestruan gjashtë vula me përmbajtje të ndryshme, njëra prej tyre me mbishkrimin e Konsullatës së Turqisë në Prishtinë, për të cilën dyshohet se ishte përdorur për përgatitjen ose vulosjen e dokumenteve të rreme. U konfiskuan gjithashtu dokumente të dyshuara si të falsifikuara, një armë, katër telefona celularë dhe dy laptopë, pajisje që dyshohet se mund të përmbajnë të dhëna për mënyrën e funksionimit të kësaj veprimtarie.

Në kontrolle u gjetën edhe kartëmonedha, si dhe 671 monedha metalike të dyshuara si të falsifikuara, me vlerë të përgjithshme 1.342 euro.

Gjashtë shtetas turq u intervistuan në cilësinë e dëshmitarëve. Sipas deklaratave të tyre, dokumentet që posedonin ishin përgatitur në zyrën "Anatolia Express". Këto dëshmi, së bashku me vulat, dokumentet, paratë dhe pajisjet elektronike të sekuestruara, janë bërë pjesë e dosjes.

Në vazhdim të procedurës pritet të shqyrtohen pretendimet e Prokurorisë, provat e mbledhura gjatë hetimeve dhe kundërshtimet e mbrojtjes. Demirtepe konsiderohet i pafajshëm derisa fajësia të vërtetohet me vendim të formës së prerë.