Policia e Berlinit: ndaj 27-vjeçarit u qëllua disa herë, motivi mbetet i paqartë

Rindërtimi i minutave të para të natës së të hënës në Berlin-Neukölln vjen nga vetë autoritetet gjermane: rreth orës 02:30, dëshmitarë njoftuan se kishin dëgjuar të shtëna me armë zjarri në Sonnenallee. Kjo ishte thirrja që vuri në lëvizje patrullat.

Zëdhënësi i Policisë së Berlinit, Florian Nath, deklaroi nga vendngjarja se policia u njoftua për ngjarjen në atë orë. Efektivët që mbërritën të parët gjetën në trotuar një burrë të plagosur rëndë me armë zjarri dhe nisën menjëherë përpjekjet për reanimim. Në vendngjarje mbërriti edhe një mjek i urgjencës, por 27-vjeçari nuk mundi të shpëtohej dhe ndërroi jetë aty ku ishte qëlluar.

Në komunikatën e mëvonshme të përbashkët, Policia dhe Prokuroria e Berlinit e vendosin ngjarjen rreth orës 02:40, në kryqëzimin Planetenstraße-Sonnenallee, në afërsi të zonës Köllnische Heide. Të dy oraret janë dhënë si të përafërta: rreth orës 02:30 në deklaratën e parë operative dhe rreth orës 02:40 në komunikatën zyrtare. Sipas njoftimit të përbashkët, ndaj 27-vjeçarit është qëlluar disa herë.

Personi ose personat e dyshuar u larguan nga vendi i ngjarjes dhe deri në përditësimet e fundit zyrtare nuk është njoftuar për asnjë arrestim. Numri i autorëve dhe motivi mbeten të paqarta.

Identiteti i viktimës nuk është bërë publik nga autoritetet gjermane. Tetova News ka verifikuar nga burimet e veta se bëhet fjalë për një 27-vjeçar me inicialet M.M. nga Radusha, ndërsa gazeta gjermane Berliner Morgenpost, duke iu referuar informacioneve të veta, raporton se ai ishte shtetas i Maqedonisë së Veriut.