Vrasja në Ksamil: 11 të arrestuar dhe dy në kërkim, i dyshuari u kap i fshehur në bagazh

Rrjeti i personave të përfshirë në vrasjen e turistit portugez në Ksamil po merr përmasa gjithnjë e më të gjera. Policia ka arrestuar 11 persona dhe ka shpallur në kërkim dy të tjerë në lidhje me ngjarjen e ndodhur mëngjesin e 18 gushtit në ambientet e lokalit "Principote", ku 20-vjeçari L. V. u godit disa herë me thikë gjatë një konflikti.

Detaji më i spikatur i hetimit lidhet me kapjen e të dyshuarit kryesor. Sipas Policisë, 29-vjeçari S. L., i njohur edhe me emrin S. V., u gjet i fshehur në bagazhin e një automjeti që po udhëtonte drejt Tiranës dhe u kap në Levan të Fierit. Në makinë ndodheshin edhe dy shtetas turq, 31-vjeçarja E. P. dhe 38-vjeçari N. M., të cilët, sipas hetimeve, kishin njohje me të dyshuarin dhe e kishin fshehur në automjet për ta ndihmuar që të largohej.

Krahas tyre, Policia ka arrestuar disa persona të tjerë, mes tyre kamarierë dhe punonjës të sigurisë së lokalit. Sipas hetimeve, disa prej tyre dyshohet se u përfshinë në konfliktin që i parapriu vrasjes, ndërsa të tjerë akuzohen se nuk njoftuan autoritetet pas ngjarjes.

Në kërkim janë shpallur dy persona: D. H., 29 vjeç, dhe B. B., 36 vjeç. Sipas hetimeve, D. H. dyshohet se e goditi me grushte viktimën gjatë konfliktit dhe akuzohet, së bashku me S. L., për "vrasje me dashje", të kryer në bashkëpunim.

Në qendër të vëmendjes së hetuesve janë vendosur edhe katër persona me detyra sigurie që ndodheshin në lokal në momentin e ngjarjes. Për ta, Policia thotë se nuk ndërhynë për të parandaluar konfliktin dhe më pas nuk njoftuan autoritetet.

Gjatë veprimeve hetimore, në Komisariatin e Policisë Sarandë u shoqëruan gjithsej 41 persona. Materialet për 13 prej tyre, të përfshirë në hetim, i janë referuar Prokurorisë së Sarandës. Për të dyshuarin kryesor dhe personin e shpallur në kërkim rëndon akuza për "Vrasje me dashje", kryer në bashkëpunim, ndërsa për personat e tjerë janë ngritur dyshime për "Përkrahje të autorit të krimit", "Moskallëzim të krimit" dhe "Mosmarrje të masave për të ndërprerë gjendjen e paligjshmërisë".