Vrasja e turistit portugez në Ksamil: arrestohet roja i plazhit, ishte fshehur në bagazh

Autori i dyshuar i vrasjes së turistit portugez në Ksamil është vënë në pranga. Sokrat Vata, 29 vjeç, banues në Has dhe i punësuar si roje plazhi në hotelin “Principotes”, u arrestua në një postbllok të ngritur në Levan të Fierit, ndërsa dyshohet se ishte përpjekur të largohej i fshehur brenda bagazhit të një makine.

Sipas burimeve, automjeti drejtohej nga një vajzë, ndërsa Vata qëndronte i mbyllur në bagazh. Pas kontrolleve të shtuara nga policia, ai u lokalizua dhe u arrestua.

Viktima, 20-vjeçari portugez Miguel Mendes, u gjet pa shenja jete rreth orës 05:15, në shezlongët e një plazhi pranë një lokali, gjatë orëve të para të mëngjesit. Nga këqyrja e trupit në morgun e Sarandës u konstatuan disa plagë të shkaktuara me thikë në shpinë dhe në kraharor. Dyshohet se i riu ka humbur jetën menjëherë si pasojë e plagëve të marra.

Sipas hetimeve paraprake, ngjarja dyshohet se ka nisur pas një konflikti për motive të dobëta. Një prej pistave që po verifikohet lidhet me një femër.

Mendes kishte ardhur në Ksamil së bashku me një grup turistësh për të kaluar pushimet në jug të Shqipërisë. Pas krimit, i dyshuari u largua nga vendi i ngjarjes, përpara se ndjekja e policisë ta çonte në pranga në Fier.