Vrasja e shqiptares në Nea Smirni: dyshohet se u vu në gjunjë para se të qëllohej dy herë

Minutat para se të dëgjoheshin të shtënat në Nea Smirni të Greqisë, viktima dyshohet se u detyrua të ulej në gjunjë ndërsa kërcënohej me armë. Menjëherë pas kësaj, ndaj saj u qëllua dy herë me armë zjarri.

Viktima është L. O., shtetase shqiptare. I dyshuari për krimin është partneri i saj, A. A., 48-vjeçar, po ashtu shqiptar. Ai nuk është shpallur fajtor nga asnjë gjykatë dhe hetimi ndaj tij vijon.

Sipas raportimeve nga mediat greke, autoritetet kanë përqendruar vëmendjen te marrëdhënia mes viktimës dhe të dyshuarit. Hetuesit po analizojnë provat e mbledhura, përfshirë tabulatet telefonike, për të rindërtuar lëvizjet dhe ngjarjet që i paraprinë vrasjes.

Në duart e autoriteteve ka rënë edhe një video, e cila dyshohet se ka regjistruar lëvizjet brenda ndërtesës pak para të shtënave. Një tjetër element që po hetohet është dyshimi se A. A. kishte vendosur një person tjetër jashtë banesës së viktimës, me detyrën për ta njoftuar në momentin kur ajo të dilte, çka i jep ngjarjes tiparet e një veprimi të përgatitur paraprakisht.

Hetimet për zbardhjen e plotë të rrethanave vazhdojnë.