Vrasja e 22-vjeçarit në një lokal të Lipjanit, gjykimi ndaj Gazmend Selimit vazhdon sot

Në Gjykatën Themelore në Prishtinë vazhdon sot gjykimi për vrasjen e 22-vjeçarit Dardan Gashi, i cili humbi jetën në një lokal në Lipjan mbrëmjen e 5 gushtit 2022. Në bankën e të akuzuarve është Gazmend Selimi, që përballet me akuzën për vrasje të rëndë në bashkëkryerje. Në të njëjtin rast akuzohet edhe Muhamet Gashi.

Nga të shtënat me armë zjarri atë mbrëmje, përveç viktimës, mbetën të plagosur edhe dy persona të tjerë.

Sipas aktakuzës së ngritur më 14 nëntor 2024, gjithçka nisi nga një mosmarrëveshje. Selimi akuzohet se pas përplasjes me viktimën dhe të dëmtuarin J.G. e kishte goditur fillimisht me grusht në fytyrë Dardan Gashin. Më pas, sipas Prokurorisë, Muhamet Gashi kishte shtënë me pistoletë në drejtim të tyre. Dardan Gashi u qëllua në gjoks dhe humbi jetën, J.G. pësoi plagë të rëndë në bark, ndërsa A.B. mori lëndime të lehta në këmbë nga predha e armës së zjarrit. Prokuroria e ngarkon Selimin me vrasje të rëndë në bashkëkryerje me Gashin.

Pas ngjarjes, të dyshuarit u larguan nga vendi i ngjarjes. Gazmend Selimi u dorëzua më vonë në polici, ku u intervistua dhe u dërgua në mbajtje me urdhër të prokurorit.

Një nga momentet më të forta të procesit erdhi në seancën e 2 shtatorit, kur dëshmoi vëllai i viktimës. Para trupit gjykues ai deklaroi: "E pashë Muhamet Gashin duke shtënë me armë". Në atë seancë Selimi ishte i pranishëm, ndërsa Gashi u soll nga paraburgimi.

Të akuzuarit prezumohen të pafajshëm deri në vërtetimin e fajësisë me vendim të formës së prerë.