Vrasja e 15-vjeçarit në Marsberg: në arrati një 23-vjeçar nga Vushtrria

Një përleshje në qytetin Marsberg të landit gjerman Nordrhein-Westfalen përfundoi me një 15-vjeçar të vrarë në vendin e ngjarjes dhe një 18-vjeçar të plagosur rëndë. Dy të dyshuarit janë në arrati dhe kërkohen publikisht, ndërsa policia gjermane i ka kërkuar ndihmë qytetarëve për lokalizimin e tyre.

Sipas Policisë së Dortmundit dhe Prokurorisë së Arnsbergut, ngjarja ndodhi të shtunën, më 19 shtator, rreth orës 20:30. Viktima 15-vjeçare pësoi plagë të rënda nga një mjet i mprehtë gjatë përleshjes dhe ndërroi jetë pa mundur të shpëtohej. Një 18-vjeçar nga Marsbergu u dërgua në spital me lëndime të rënda, të cilat, sipas raportimeve, ishin përqendruar në pjesën e fytyrës.

Hetimet e deritanishme tregojnë se përleshjes fatale i ka paraprirë një konflikt verbal mes dy të dyshuarve dhe një grupi personash nga Marsbergu dhe Rütheni, mes të cilëve ndodheshin edhe dy viktimat. Konflikti eskaloi më pas në përleshje fizike me katër persona të përfshirë.

Autoritetet gjermane kanë publikuar fotografitë e dy të dyshuarve: Albin Bejtullahu, 23 vjeç, shtetas i Kosovës nga Vushtrria, dhe Alex Olntasi, 22 vjeç, të dy me banim në Hamm. Për të dy është lëshuar urdhër-arrest nën dyshimin për vrasje dhe lëndim të rëndë trupor. Origjina e të dyshuarit të dytë është raportuar nga Greqia.

Policia gjermane u ka bërë thirrje qytetarëve që, nëse i shohin të dyshuarit ose kanë informacione për vendndodhjen e tyre, të mos ndërmarrin veprime vetjake, por të njoftojnë menjëherë autoritetet. Njëkohësisht, policia dhe prokuroria kanë theksuar se aktualisht nuk vlerësohet se ekziston rrezik për publikun.

Si shkak i mundshëm i konfliktit është përmendur një borxh prej 200 eurosh, por ky pretendim nuk është konfirmuar zyrtarisht nga policia gjermane. Hetimet për zbardhjen e plotë të rastit vazhdojnë, ndërsa asnjë nga të dyshuarit nuk është shpallur fajtor derisa nuk vendos gjykata.