Vrasja e 15-vjeçarit në Gjermani: dy të rinj, një shqiptar e një grek, nën arrest

Një adoleshent 15-vjeçar humbi jetën më 21 shtator në Marsberg-Essentho të Gjermanisë, pasi u godit me thikë. Për vrasjen e tij dyshohen dy të rinj: një shqiptar 23-vjeçar dhe një grek 22-vjeçar.

Ngjarja ndodhi pas një feste. Çfarë e shkaktoi sulmin, ende nuk dihet. Të përditshmes gjermane Bild i janë referuar dy versione të ndryshme. I pari flet për një zënkë mes dy të dyshuarve nga njëra anë dhe 15-vjeçarit e një 18-vjeçari që ishte me të nga ana tjetër, gjoja për një borxh prej 200 eurosh. Sipas versionit të dytë, dy të miturit po mbronin dy shoqe të tyre kur u sulmuan. Asnjëra nga këto pretendime nuk është konfirmuar zyrtarisht.

Pas sulmit, dy të dyshuarit u larguan nga vendngjarja. Policia gjermane publikoi fotografitë e tyre dhe, menjëherë pas kësaj, të dy u paraqitën vetë në stacionin policor të Hammit. Ndaj tyre u caktua masa e arrestit, por ende nuk ka vendim gjykate për rastin dhe të dy konsiderohen të pafajshëm deri në një vendim përfundimtar.

Tronditja ka prekur edhe familjen e viktimës: prindi i 15-vjeçarit, sipas raportimeve në Gjermani, ra pa ndjenja kur mori lajmin për vdekjen e të birit. Tri familjet e përfshira në këtë ngjarje presin tani që drejtësia të thotë fjalën e saj.