Vjena i bashkohet valës së protestave: "Liri për çlirimtarët" para flamujve të UÇK-së

Flamuj kuq e zi dhe flamuj të UÇK-së u valëvitën sot në kryeqytetin austriak. Diaspora shqiptare në Vjenë doli në protestë kundër aktgjykimit dënues ndaj katër ish-komandantëve të UÇK-së, duke përcjellë mesazhin "Liri për çlirimtarët".

Tubimi në Vjenë zgjeron hartën e reagimit të shqiptarëve jashtë vendit. Protesta të ngjashme janë mbajtur tashmë në Gjermani, Zvicër dhe Kanada, ndërsa bashkatdhetarët e mbledhur në Austri u bashkuan me të njëjtën thirrje.

Vala e tubimeve ka nisur pas vendimit të Dhomave të Specializuara të Kosovës ndaj ish-krerëve të UÇK-së. Numri i pjesëmarrësve në protestën e Vjenës nuk është bërë i ditur.

Mobilizimi nuk po kufizohet vetëm te diaspora. Protestave pritet t'u bashkohet edhe Skenderaj, ku nxënësit do të dalin nesër.