Vitia premton subvencion të plotë për protezat e çdo invalidi të luftës

Asnjë invalid i luftës, qoftë ushtar apo civil, nuk do të mbetet pa subvencionim të plotë për proteza. Këtë garanci e ka dhënë ministri i Shëndetësisë, Arben Vitia, i cili tha se kushdo nga kjo kategori që paraqet kërkesë në Fondin për Sigurime Shëndetësore do ta ketë lëndën të trajtuar.

Sipas Vitias, Ministria e Shëndetësisë e ka ngritur këtë mekanizëm në bashkëpunim me shoqatat e dala nga lufta, me synimin që trajtimi i kërkesave të jetë i garantuar. "Me shoqatat e dala nga lufta, e kemi bërë një sistem dhe tani as edhe një invalid i luftës nuk ka shans të mos i përgjigjet ministria me subvencionim të plotë", deklaroi ministri.

Vitia e paraqiti ndryshimin si kthesë nga praktika e mëparshme. Deri në vitin 2024, sipas tij, mbulimi i shpenzimeve për proteza nuk ka qenë plotësisht institucional, pasi varej nga vendimet e qeverive për të ndarë apo jo fonde. "Deri në vitin 2024, mbulimi i protezave ka ndodhur në një mënyrë pak a shumë joinstitucionale, që ka qenë në vullnetin e qeverive për të ndarë apo jo fonde për t’i mbuluar shpenzimet e këtyre personave që kanë dhënë gjymtyrët për vendin tonë", tha ai.

Ministri u zotua se çdo kërkesë e dorëzuar në Fondin për Sigurime Shëndetësore do të shqyrtohet, duke theksuar se sistemi i ri synon t'u sigurojë invalidëve të luftës mbështetje të plotë.