Virusi i Nilit Perëndimor merr dy jetë në Kosovë: shtatë raste të konfirmuara, tri në Gjakovë

Dy vdekje brenda një jave. Kaq ka mjaftuar që virusi i Nilit Perëndimor të kalojë nga një rrezik i largët evropian në një problem të hapur shëndetësor në Kosovë.

Instituti Kombëtar i Shëndetësisë Publike të Kosovës (IKSHPK) ka njoftuar se gjatë periudhës 7 gusht deri më 18 shtator 2026 janë konfirmuar shtatë raste të infeksionit me virusin e Nilit Perëndimor (WNV), të gjitha të vërtetuara në Laboratorin e Mikrobiologjisë. Gjatë kësaj jave janë raportuar edhe dy raste vdekjeje nga ky infeksion.

Të gjithë pacientët janë hospitalizuar në Klinikën Infektive të QKUK-së në Prishtinë. Sipas IKSHPK-së, pesë prej të infektuarve janë meshkuj dhe dy femra. Dy raste i përkasin grupmoshës 10-19 vjeç, ndërsa të tjerat janë të moshave deri në 79 vjeç.

Pamja klinike është e rëndë për shumicën: tre pacientë janë paraqitur me shenja të meningjitit akut, tre me meningoencefalit akut dhe një rast me gjendje febrile.

Gjeografia e infeksionit tregon një përqendrim të qartë. Tri raste janë regjistruar në Gjakovë, ndërsa nga një rast në Prishtinë, Shtime, Ferizaj dhe Pejë. Nga analiza fillestare, IKSHPK-ja nuk ka evidentuar ndonjë lidhje epidemiologjike mes të infektuarve, prandaj rastet janë klasifikuar si sporadike. Vetëm njëri prej shtatë pacientëve ka raportuar histori udhëtimi jashtë vendit, çka do të thotë se pjesa dërrmuese e infeksioneve janë marrë brenda vendit.

Situata nuk është e izoluar në rajon. Sipas të dhënave të Qendrës Evropiane për Parandalimin dhe Kontrollin e Sëmundjeve (ECDC), nga fillimi i sezonit të transmetimit në vitin 2026 e deri më 10 shtator, në 15 shtete evropiane janë identifikuar gjithsej 1.285 raste humane të virusit të Nilit Perëndimor, përfshirë edhe vende fqinje me Kosovën.

Në terren, një ekip i IKSHPK-së në bashkëpunim me Qendrën Rajonale të Shëndetit Publik në Gjakovë po zhvillon hetime epidemiologjike pikërisht në komunën me numrin më të madh të rasteve. Aktivitete të ngjashme janë ndërmarrë edhe nga QRSHP Ferizaj, ndërsa qendrat rajonale kanë planifikuar takime me komunat gjatë javës së ardhshme. Të gjitha Qendrat Rajonale të Shëndetit Publik kanë komunikuar me komunat e rajoneve përkatëse për ngritjen e vigjilencës dhe marrjen e masave parandaluese. Në laboratorët e institutit po analizohen edhe mostra të tjera të dyshimta.

IKSHPK-ja u ka bërë thirrje të gjitha komunave, veçanërisht atyre ku janë konfirmuar rastet, që të intensifikojnë dezinsektimin kundër mushkonjave dhe eliminimin e vatrave të shumimit të tyre. Masat, sipas institutit, duhet të përfshijnë spërkatjen në zonat me prani të shtuar të mushkonjave, largimin e mbeturinave dhe sanimin e kanalizimeve të hapura.

Për qytetarët, rekomandimet janë konkrete. "Për mbrojtje personale rekomandohet përdorimi i repelentëve kundër mushkonjave, veshja e rrobave me ngjyra të çelëta që mbulojnë pjesën më të madhe të trupit, vendosja e rrjetave mbrojtëse në dritare dhe përdorimi i pajisjeve mbrojtëse në ambient të jashtëm. Udhëtarët që vizitojnë zona ku raportohen infeksione të transmetuara nga mushkonjat, pas kthimit, rekomandohet të përcillet gjendja shëndetësore për paraqitjen e temperaturës, dhimbjes së kokës, lodhjes, skuqjes së lëkurës ose shenjave neurologjike. Në rast të shfaqjes së simptomave duhet të kërkohet vlerësim mjekësor pa vonesë dhe profesionisti shëndetësor të informohet për historinë e udhëtimit dhe ekspozimin e mundshëm ndaj mushkonjave", thuhet në rekomandimet e IKSHPK-së.