Veteranët e UÇK-së pas Haradinajt: Thaçi ta rimarrë mandatin dhe të zgjidhet president

Propozimi i ish-komandantit të UÇK-së dhe ish-kryeministrit Ramush Haradinaj për Hashim Thaçin ka marrë mbështetjen publike të Organizatës së Veteranëve të Luftës së UÇK-së. Sipas organizatës, Thaçi duhet "të rimarrë mandatin nga Kuvendi i Kosovës dhe të zgjidhet president me t'u kthyer në Kosovë".

Veteranët e cilësojnë propozimin si nismë që "mbart peshë kombëtare dhe institucionale dhe i shërben frymës unifikuese në vend". Argumentin e tyre e ndërtojnë mbi biografinë politike të Thaçit: "Roli i Hashim Thaçit në shërbim të luftës çlirimtare dhe më pas përgjegjësitë institucionale nëpër të gjitha proceset shtetformuese dhe shtetndërtuese janë garanci dhe siguri për ecjen përpara të Kosovës në krah me aleatët tanë strategjikë".

OVL e UÇK-së insiston se çdo hap duhet të mbetet brenda kornizës ligjore. Kthimi i Thaçit, thotë organizata, "duhet pritur me dinjitet institucional dhe me zgjidhje të ligjshme, që nuk lejon që vakuumi i tanishëm institucional dhe rrethanat degraduese ta mbajnë Kosovën peng dhe ta shpien në drejtim të gabuar".

Reagimi mbyllet me një thirrje të drejtpërdrejtë ndaj klasës politike në Kosovë: "Institucionet relevante dhe forcat politike të Kosovës duhet ta shqyrtojnë seriozisht këtë propozim, përtej ndasive partiake. Sot Kosova ka nevojë më shumë se kurrë që të mbizotërojë interesi kombëtar, dinjiteti dhe siguria e shtetit, duke mos anashkaluar asnjëherë nderimin dhe respektin për ata që luftuan, sakrifikuan dhe fituan lirinë dhe shtetësinë e Kosovës".