Pas Pushkollit dhe Ramadanit, veteranët paralajmërojnë: kujdes në kalim nëpër Maqedoni

Kalimi nëpër Maqedoninë e Veriut përfundoi me një intervistim nga autoritetet e sigurisë për Fadil Pushkollin, veteran i Ushtrisë Çlirimtare të Kosovës (UÇK). Pas bisedës me autoritetet maqedonase, ai u lirua menjëherë, ndërsa arsyeja e ndalimit nuk është bërë e ditur.

Pushkolli nuk është i pari. Në korrik të vitit 2024, ish-ushtari i UÇK-së Blerim Ramadani u ndalua në pikën kufitare të Jazhincës dhe u vendos në arrest shtëpiak në Shkup, prej nga më vonë u arratis.

Për ish-komandantin e FSK-së, Kadri Kastrati, këto raste e bëjnë Maqedoninë e Veriut një vend të pasigurt për veteranët. Ai tregon se para se të nisej në rrugë ka kërkuar këshillë nga njerëz që i njohin mirë rrethanat atje, përfshirë mikun e tij Xhaferi, të cilin e përshkruan si ish-kryetar të parlamentit. "Unë personalisht kam kontaktuar disa miq të mi të cilët jetojnë atje dhe kanë qenë më herët edhe ish-kryetar të parlamentit, z. Xhaferi dhe miq të tjerë që i kam pyetur a ka rrezik me kaluar nëpërmjet Maqedonisë, më kanë sugjeruar që unë mos të kaloj, d.m.th. rreziku ekziston", thotë Kastrati.

Paralajmërimi vjen edhe nga Organizata e Veteranëve të Luftës së UÇK-së, e cila u kërkon bashkëluftëtarëve më shumë kujdes kur kalojnë nëpër shtetin fqinj dhe t'i shmangin fare udhëtimet nëpër Serbi. Fatmir Sopi, nga kjo organizatë, përmend probleme edhe në vende të tjera: "Edhe nga këtu i bëjmë thirrje që sidomos nëpër Serbi të mos bëjnë udhëtim, ndërsa sa i përket tash problemeve në Maqedoni, kemi pasur një problem edhe në Kroaci dhe në Mal të Zi, përjashto Kroacinë ku ka ndikim Serbia, duhet të kemi kujdes që mos të udhëtojmë pa nevojë sepse nuk janë të sigurt".

Kastrati e kthen gishtin nga Prishtina zyrtare. Sipas tij, qeveria duhet të kërkojë përgjigje drejtpërdrejt nga homologët maqedonas për një dyshim të rëndë: nëse emrat e veteranëve ndodhen në një bazë të dhënash të brendshme të dhënë nga Serbia. "Qeveria e Republikës së Kosovës, kryeministri, ministri i Punëve të Jashtme, ministri i Punëve të Brendshme do të duhej që të kontaktojnë homologët e vet në Republikën e Maqedonisë që të dinë se a u ka dhënë Serbia një listë të brendshme edhe Republikës së Maqedonisë dhe a janë këta njerëz jo në Interpol por në atë data-bazën e brendshme të shtetit fqinj, por Qeveria jonë është në gjumë", shprehet ai.

Në të njëjtën linjë, Sopi thekson se veteranët nuk kanë mjete për ta zgjidhur vetë problemin dhe se barra u takon dy ministrive kyçe. "Është detyrë e institucioneve tona që të sigurojnë lëvizje të lirë, kjo është në domenin e Ministrisë së Punëve të Jashtme, Ministrisë së Punëve të Brendshme që koordinohet me shtetet mike, shtete që na kanë njohur që qytetarët të jenë të lirë të udhëtojnë sepse përndryshe individualisht nuk kemi çfarë të bëjmë", thotë ai.