Vendimi i Trumpit për stërvitjet me Korenë e Jugut ndez përplasjen në Kongres

Vendimi i presidentit amerikan Donald Trump për të zvogëluar stërvitjet e përbashkëta ushtarake mes Shteteve të Bashkuara dhe Koresë së Jugut ka nxitur një valë kritikash në Uashington, ku disa demokratë e akuzojnë atë se po braktis aleatët e vendit.

Sulmi më i drejtpërdrejtë erdhi nga Jack Reed, demokrati kryesor në Komitetin e Shërbimeve të Armatosura të Senatit, i cili e cilësoi vendimin "të marrë" ("inane") dhe tha se ai përcjell mesazhin që "angazhimet e Amerikës janë të negociueshme". Në një deklaratë të hënën, Reed paralajmëroi: "Kina dhe Rusia po shohin sa lehtë ky president i braktis aleatët e Amerikës dhe do ta mbajnë mend këtë herën tjetër kur të na vënë në provë."

Kundërshtimi nuk ka ardhur vetëm nga radhët demokrate. Senatori republikan Thom Tillis ka deklaruar se vendimi i lejon Koresë së Veriut t'i ofrojë më shumë mbështetje Rusisë në Ukrainë.

Trump njoftoi të dielën se kishte urdhëruar Pentagonin të "zvogëlojë ndjeshëm" ("substantially reduce") stërvitjet e përbashkëta me forcat jugkoreane. Ai e lidhi vendimin me "marrëdhënien shumë të mirë" që thotë se ka me udhëheqësin verikorean Kim Jong Un, si dhe me refuzimin e Seulit për t'iu bashkuar luftës SHBA-Izrael kundër Iranit. "Së fundmi e pyeta Presidentin e Koresë së Jugut nëse do të donin të na bashkoheshin në çbërjen bërthamore të Republikës Islamike të Iranit, dhe ata thanë: 'Jo, faleminderit!'", shkroi Trump në platformën e tij Truth Social. Presidenti amerikan e paraqet shpesh luftën me Iranin si një përpjekje për çbërje bërthamore, ndonëse Teherani thotë se nuk zotëron armë bërthamore.

Kritikat theksuan gjithashtu mënyrën se si u mor vendimi. Senatori demokrat Andy Kim e akuzoi Trumpin se po e shpërfill partneritetin me Seulin. "Vendimet për stërvitjet e përbashkëta duhet të merren bashkërisht – jo të shpallen njëanshëm përmes rrjeteve sociale", shkroi ai në rrjetin X, duke shtuar: "Do të vazhdoj ta shtyj këtë administratë të forcojë lidhjet tona të sigurisë, ekonomike, tregtare dhe teknologjike – që u shërbejnë popullit amerikan dhe rajonit më të gjerë të Indo-Paqësorit."

Kongresistja Pramila Jayapal e quajti vendimin e Trumpit "të rrezikshëm" për stabilitetin e rajonit. "Pra – sundimtari ynë amerikan që aspiron të jetë autoritar ka vendosur ta braktisë demokracinë në Korenë e Jugut për rregullat autoritare në Korenë e Veriut që i admiron aq shumë?", shkroi ajo në një postim në rrjetet sociale.

Stërvitjet ushtarake me Korenë e Jugut janë pjesë e një partneriteti mbrojtës disadekadash mes dy vendeve, që përfshin Traktatin e Mbrojtjes së Ndërsjellë të vitit 1953, i cili e vendosi praktikisht Seulin nën ombrellën e sigurisë së Uashingtonit. Në një dokument informues, Departamenti amerikan i Shtetit e përshkruan partneritetin strategjik me Korenë e Jugut si "shtyllë për sigurinë dhe stabilitetin në Indo-Paqësor".