Vdes në QKUK gruaja nga Klina e sulmuar në familje, i dyshuari ende në arrati

Një grua nga Klina, e cila po trajtohej në Qendrën Klinike Universitare të Kosovës (QKUK) pas një sulmi fizik brenda familjes, ka ndërruar jetë, ka njoftuar Policia e Kosovës.

Sipas policisë, gruaja ishte sulmuar fizikisht nga një burrë, i cili tani konsiderohet i dyshuar për rastin. Ngjarja është regjistruar në Klinë, rreth orës 18:30, dhe fillimisht ishte cilësuar si dhunë në familje dhe lëndim i rëndë trupor.

Gruaja u dërgua në QKUK për trajtim, por nuk mbijetoi. Me vendim të prokurorit, trupi i saj është dërguar në Institutin e Mjekësisë Ligjore (IML) për obduksion, i cili pritet të përcaktojë shkakun e saktë të vdekjes.

I dyshuari ndodhet në kërkim policor. Policia nuk ka bërë të ditur nëse rasti do të rikualifikohet pas vdekjes së viktimës.