Vatikani, "seriozisht i shqetësuar" për zbatimin e marrëveshjes mes Libanit dhe Izraelit

Vatikani shprehu të enjten "shqetësim serioz" për mënyrën se si po zbatohet marrëveshja kuadër mes Izraelit dhe Libanit, e arritur në fund të qershorit nën patronazhin e Shteteve të Bashkuara. Qëndrimi u bë publik gjatë një audience të Papës Leoni XIV me presidentin libanez, Joseph Aoun.

"Selia e Shenjtë, ndonëse mirëpret nënshkrimin e këtij dokumenti, ka shprehur shqetësim të thellë për vështirësitë me të cilat përballet zbatimi i tij dhe ka rikonfirmuar mbështetjen e saj për përpjekjet që po bëhen në këtë drejtim", njoftoi Vatikani.

Takimi u zhvillua në ditën e parë të vizitës së Aounit në Itali. Presidenti libanez u prit nga Papa Leoni XIV, papa amerikan, në një audiencë private që zgjati tridhjetë minuta.

Sipas njoftimit të presidencës libaneze, Aoun i kërkoi Papës Leon të intensifikojë përpjekjet diplomatike me qëllim që t'u jepet fund sulmeve të ushtrisë izraelite dhe të sigurohet tërheqja e saj nga jugu i vendit. Qëllimi, thuhet në komunikatë, është të garantohet "që Izraeli të respektojë kushtet" e marrëveshjes, "duke ndërprerë sulmet e përditshme, veçanërisht ato të drejtuara ndaj civilëve, infrastrukturës dhe fshatrave në jugun e Libanit".

Aoun i bëri thirrje gjithashtu Vatikanit që të "mbështesë përpjekjet e Libanit për të arritur tërheqjen e plotë të Izraelit nga territoret e pushtuara libaneze" dhe kthimin e mijëra personave të zhvendosur.

Përkundër armëpushimit, Izraeli vazhdon të kryejë sulme vdekjeprurëse në Liban, transmeton agjencia franceze AFP. Forcat izraelite kanë krijuar atë që e quajnë "zonë sigurie" në jugun e Libanit — një brez me gjerësi rreth 10 kilometra përgjatë kufirit.

Të premten, Aoun pritet të takohet edhe me kryeministren italiane Giorgia Meloni, për të biseduar mbi të ardhmen e forcave paqeruajtëse të OKB-së në vendin e tij, mandati i të cilave skadon në fund të këtij viti. Si partnere historike e Libanit, Selia e Shenjtë luan një rol aktiv edhe në terren përmes nunciaturës së saj dhe në qarqet diplomatike, shton France Presse.