ReklamëHapësirë reklame
ReklamëHapësirë reklame
Reklamë
Ministrja në detyrë e Ekonomisë, Artane Rizvanolli, nuk e mohon se vagonët e Trainkos u riparuan në Zrenjanin të Serbisë, por i kthehet opozitës me vitin 2017. Ndërkohë, ish-deputeti i Vetëvendosjes, Visar Korenica, thotë se e kishte njoftuar kryeministrin Albin Kurti për kontratën dhe nuk mori kurrë përgjigje.
Çështja e vagonëve të ndërmarrjes publike Trainkos, të dërguar për riparim në Serbi, ka kaluar nga faza e akuzave opozitare në atë të pranimit institucional. Ministrja në detyrë e Ekonomisë, Artane Rizvanolli, nuk e ka mohuar se vagonët janë dërguar për riparim në Zrenjanin të Serbisë, duke argumentuar se e njëjta praktikë ka ndodhur edhe më parë.
"Vagonët janë dërguar për riparim në Zrenjanin në Serbi për herë të parë më 2017, sapo janë blerë, në procedurë të nisur në kohë të Qeverisë Mustafa e të përuruar në kohë të Qeverisë Haradinaj, nga ministri Pal Lekaj", ka deklaruar Rizvanolli, e cila ka publikuar edhe një fotografi të asaj periudhe si dhe një dokument të nënshkruar për renovim.
Ministrja ka drejtuar pyetjen edhe nga Aleanca për Ardhmërinë e Kosovës: "A ka qenë AAK-ja e bregosur për këtë çështje në vitin 2017 kur Ministri i tyre e prente shiritin për vagonët e riparuar në Serbi". Sipas saj, procedura e vitit 2017 ishte nisur në kohën e Qeverisë Mustafa, ndërsa përurimi i vagonëve të riparuar ishte bërë në kohën e Qeverisë Haradinaj, nga ministri i atëhershëm i Infrastrukturës, Pal Lekaj.
Reagimi i saj erdhi pasi deputeti i AAK-së, Daut Haradinaj, publikoi një dokument të Trainkos-it të datës 13 nëntor 2024, që sipas tij dëshmon dërgimin e vagonëve për riparim në Serbi gjatë vitit 2024. Dokumenti i referohet projektit për "Riparimin e Mesëm të Vagonëve të Udhëtarëve" dhe kontratës me numër 10908-24-1153-2-1-1/C175.
Sipas këtij dokumenti, një komision i Trainkos-it kishte udhëtuar më 6 tetor 2024 në punëtorinë e kompanisë "Shin Voz d.o.o." në Zrenjanin të Serbisë. Punimet në atë punishte kishin nisur më 7 nëntor 2024, ndërsa pas riparimit të mesëm ishin kryer testimet e vagonëve. Në dokument përmenden pesë vagonë me numrat serikë 50 00 2235 023-4, 50 00 2235 024-2, 50 00 8435 027-0, 50 00 8435 028-8 dhe 50 00 2235 030-9. Raporti konstaton se vagonët i kishin përmbushur parametrat e kërkuar dhe ishin pranuar teknikisht, ndërsa pranimi fizik do të bëhej pas kthimit të tyre në territorin e Kosovës. Për këtë renovim, institucionet e Kosovës i dhanë Serbisë rreth gjysmë milioni euro në vitin 2024.
Zhvillimi më i rëndë politik vjen nga brenda radhëve të vetë partisë në pushtet. Ish-deputeti i Lëvizjes Vetëvendosje, Visar Korenica, ka deklaruar se e kishte informuar kryeministrin Albin Kurti për kontratën, pa marrë kurrë përgjigje. "E konfirmoj që nuk kam marrë përgjigje asnjëherë nga z. Kurti. Përveç tij kam njoftuar edhe të tjerë, por kanë zgjedhur ta heshtin këtë tender korruptiv që ka cenuar edhe sigurinë publike", ka thënë Korenica, i cili më herët kishte ngritur shqetësime për parregullsi në proces dhe kishte pretenduar se çështja mund të cenonte sigurinë e transportit.
Mbi këtë deklaratë është mbështetur edhe deputetja e zgjedhur e PDK-së, Blerta Deliu-Kodra. "Albin Kurti paska qenë i informuar qysh më 24 maj 2024 për kontratën e Trainkos-it për renovimin e vagonëve në Serbi. I paralajmëruar. I informuar. Në dijeni. Dhe ka heshtur. Sot ndëshkohet punëtori që flet, ndërsa askush nuk jep përgjegjësi për ata që e kanë ditur dhe e kanë lejuar", ka shkruar ajo.
Referenca për punëtorin e ndëshkuar lidhet me një email të ushtruesit ekzekutiv të Trainkos-it, Agron Statovci, të publikuar nga Daut Haradinaj së bashku me foton e një automjeti me targa të Serbisë brenda ndërmarrjes. Sipas Haradinajt, ka shumë dëshmi që vërtetojnë prezencën e serbëve nga Serbia në emër të ekspertizës në këtë ndërmarrje. "Kryeshefi e mohonte, sepse nuk besonte se do t'i dilnin faktet! Shihni foton dhe emailin! Fol, Kryeministër! Çka është kjo? Pas pak edhe video", ka shkruar ai.
Në email kërkohet marrja e deklaratës me shkrim nga punonjësi Asdren Ademi, i cili në faqen zyrtare të Ministrisë së Ekonomisë kishte komentuar se vagonët e Trainkos "janë riparuar në Serbi". "Bazuar në Rregulloren për krijimin e mardhënies së punës, Kodin e Etikës dhe detyrimet e punonjësve për mbrojtjen e reputacionit të ndërmarrjes, ju kërkoj që të ndërmerrni veprimet e nevojshme administrative për marrjen e deklaratës me shkrim nga punonjësi Asdren Ademi lidhur me komentin e publikuar në rrjetin social Facebook, në faqen zyrtare të Ministrisë së Ekonomisë, nga të cilat subencionohemi dhe mbajm përgjegjësi për shfrytëzimin e parasë publike", thuhet në shkresë.
Dokumenti vazhdon: "Duke qenë se ky është një pretendim i bërë publikisht, punonjësi duhet të paraqesë faktet dhe provat mbi të cilat e mbështet këtë deklarim, nëse rpetendon se ndërmarrja ka kryer riparimin e vagonëve në Serbi." Po ashtu kërkohet që "Deklarata dhe çdo provë e ofruar bashkë me vendimin marrje, nëse ekzistojnë elemente të shkeljes së detyrimeve të punës apo të Kodit të Etikës, dhe sipas afateve të parapara me Rregullore, duhet të përcillen Zyrës së Kryeshefit." Deri në përfundim të procedurave, sipas emailit, Ademit i refuzohet kërkesa për pushim ditor apo vjetor.
Presioni politik po rritet nga disa drejtime. Deputeti i Aleancës, Burim Ramadani, ka kërkuar shkarkimin e ministres Rizvanolli, duke e vënë theksin te momenti i nënshkrimit të kontratës me kompaninë serbe, pak kohë pas sulmit në Banjskë. "Pas sulmit në Banjskë, pushteti bën biznes direkt në Serbi. I japin kontratë Serbisë. Shkojnë në Serbi për renovim të vagonëve. Krejt kjo në vitin 2024", ka shkruar ai. Daut Haradinaj, nga ana e tij, ka kritikuar Qeverinë e udhëhequr nga Vetëvendosje për marrëveshjet me kompani nga Serbia dhe ka pretenduar se punëtorë janë larguar nga puna pasi kanë ngritur shqetësime dhe kanë bërë publike informacione për këto marrëveshje.
Ndërsa akuzat e opozitës përqendrohen te përgjegjësia politike dhe te trajtimi i punonjësit që foli publikisht, mbrojtja e ministres kthehet te precedenti i vitit 2017. Deri më tani, Qeveria e Kosovës nuk ka dhënë reagim për vetë kontratën dhe pretendimet e ngritura nga deputetët e Aleancës.
Invalidët e UÇK-së, familjarët e dëshmorëve dhe të të zhdukurve, si dhe viktimat e dhunës seksuale gjatë luftës që jetojnë jashtë vendit lirohen nga tarifat për dokumente. Vendimi i MPJD-së është në fuqi që nga 14 tetori 2026.
