SHBA riorganizon ushtrinë në Kosovë, evropianët drejt përgjegjësisë kryesore në KFOR

Pas Gardës Kombëtare, në Kosovë vjen ushtria e rregullt amerikane. Ushtria Amerikane për Evropë dhe Afrikë ka njoftuar se, në kuadër të misionit të Forcës së NATO-s në Kosovë (KFOR), do të dislokohen ushtarë nga Regjimenti i 2-të i Kalorësisë dhe njësi mbështetëse të Divizionit të Parë të Këmbësorisë.

Këto trupa do të zëvendësojnë Grupin Luftarak të Brigadës së 53-të të Këmbësorisë së Gardës Kombëtare të Floridës. Ndryshimi prek edhe komponentin ajror: pjesë të Brigadës së Aviacionit Luftarak të Divizionit të Parë të Këmbësorisë do të marrin vendin e Batalionit të 2-të të Regjimentit të 135-të të Aviacionit të Gardës Kombëtare të Kolorados. Numri i ushtarëve dhe data e rotacionit nuk janë bërë të ditura.

Lëvizja lidhet me përpjekjet e NATO-s për të optimizuar strukturën e KFOR-it, pas një rishikimi të kryer nga Shtabi Suprem i Fuqive Aleate në Evropë (SHAPE). Sipas njoftimit amerikan, ndryshimet pasqyrojnë përmirësimin e kushteve të sigurisë dhe synojnë një përshtatje graduale të misionit, të bazuar në kushtet në terren, në mënyrë që KFOR-i të mbetet i gatshëm për të përmbushur detyrat e tij. Në këtë proces, aleatët evropianë pritet të marrin përgjegjësinë kryesore, në përputhje me kalimin drejt konceptit të NATO-s 3.0.

Rotacioni shënon edhe një ndryshim në mënyrën se si Shtetet e Bashkuara angazhojnë ushtarët e tyre në Kosovë: nga njësitë e Gardës Kombëtare drejt forcave të dislokuara përmes strukturave ushtarake të teatrit të operacioneve, pa e ndërprerë mbështetjen për KFOR-in.

Koloneli Samuel Sargent, duke folur për përfundimin e misionit të Brigadës së 53-të të Këmbësorisë, e cilësoi shërbimin në Kosovë si nder. "Shërbimi përkrah aleatëve dhe partnerëve tanë të NATO-s në Kosovë ka qenë një nder për ushtarët tanë. Grupi Luftarak i Brigadës së 53-të të Këmbësorisë mbetet krenar për profesionalizmin dhe përkushtimin që trupat tona kanë dëshmuar gjatë këtij misioni. Jemi të bindur se njësia që do të vijë do të vazhdojë t’i forcojë përpjekjet e KFOR-it për të ruajtur një mjedis të sigurt dhe të mbrojtur për të gjitha komunitetet", tha ai.

Nga ana e njësive që vijnë, koloneli Jabari M. Miller, zëvendësshef i mirëmbajtjes në Divizionin e Parë të Blinduar dhe komandant i ardhshëm i Komandës Rajonale Lindje, theksoi gatishmërinë e ushtarëve. "Divizioni i Parë i Këmbësorisë, së bashku me kolegët tanë nga Regjimenti i 2-të i Kalorësisë, e konsiderojnë nder marrjen sërish përsipër të këtij misioni jetik. Ushtarët tanë janë në formë të mirë fizike, të motivuar, të disiplinuar, të trajnuar dhe të gatshëm të punojnë përkrah aleatëve dhe partnerëve tanë të NATO-s për të ruajtur një mjedis të sigurt dhe të mbrojtur në Kosovë. E falënderojmë Grupin Luftarak të Brigadës së 53-të të Këmbësorisë për shërbimin e tij të jashtëzakonshëm dhe mbetemi të përkushtuar për të siguruar mbështetje të vazhdueshme për misionin e KFOR-it", deklaroi Miller.