Takimi me Kurtin bie në ujë, komandanti i KFOR-it pret në "Film City" gjeneralin nga Sarajeva

Agjenda e komandantit të KFOR-it ndryshoi brenda ditës. Takimi i planifikuar ndërmjet gjeneralmajorit Özkan Ulutaş dhe kryeministrit në detyrë Albin Kurti nuk u zhvillua, ndërsa KFOR-i konfirmoi se arsyeja ishin "rrethanat e paparashikuara". Pak orë më pas, i njëjti komandant priti në zyrën e tij një zyrtar tjetër të lartë ushtarak të Aleancës.

Në Shtabin e KFOR-it, në kampin "Film City", Ulutaş u takua me komandantin e Shtabit të NATO-s në Sarajevë, gjeneral brigade James C. Fowler. Në fokus të bisedës, sipas misionit paqeruajtës, ishin situata e sigurisë në rajon dhe zhvillimet që lidhen me misionet e NATO-s në Ballkan.

Gjatë takimit, komandanti i KFOR-it riafirmoi përkushtimin e misionit për ruajtjen e një ambienti të sigurt dhe të qëndrueshëm për të gjithë qytetarët në Kosovë, duke prezantuar para bashkëbiseduesit aktivitetet që misioni po zhvillon në terren dhe prioritetet e tij kryesore.

"KFOR-i vazhdon të zbatojë mandatin e tij, bazuar në Rezolutën 1244 të Këshillit të Sigurimit të OKB-së të vitit 1999, për të kontribuar në një mjedis të sigurt për të gjithë njerëzit që jetojnë në Kosovë dhe lirinë e lëvizjes; në çdo kohë, në mënyrë të paanshme dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si reagues të sigurisë", thuhet në njoftimin e KFOR-it.

Mbi anulimin e takimit me kryeministrin në detyrë, misioni i NATO-s nuk dha detaje shtesë. U theksua vetëm se Ulutaş vazhdon të jetë në kontakt të ngushtë me bashkëbiseduesit e tij kryesorë, përfshirë përfaqësuesit e institucioneve të Kosovës.