Ura e Ibrit kalon te Policia e Kosovës, ndërsa KFOR-i paralajmëron: situata mbetet e brishtë

Përgjegjësia për urën kryesore mbi Ibër, në Mitrovicë, po kalon nga KFOR-i te Policia e Kosovës. Ndryshimi po ndodh në të njëjtën kohë kur komandën e KFOR-it e ka marrë gjenerali italian Roberto Vergori. Këtë e ka raportuar Infodifesa.it, medium italian që mbulon çështjet e mbrojtjes.

Ura nuk është e vetmja pikë ku roli i policisë po zgjerohet. Sipas mediumit italian, Policia e Kosovës është përfshirë edhe në dispozitivin e sigurisë përreth Manastirit të Deçanit. "Tranzicioni tashmë është i dukshëm në terren: kalimi i përgjegjësisë për urën kryesore mbi Ibër, në Mitrovicë, te Policia e Kosovës, si dhe përfshirja e kësaj policie në dispozitivin e sigurisë përreth Manastirit të Deçanit."

Para se të largohej nga detyra, komandanti i deritanishëm i KFOR-it, gjenerali turk Ozkan Ulutas, kishte theksuar se ky riorganizim nuk e ndryshon rolin e misionit. Sipas tij, "optimizimi nuk përbën transferim të mandatit të KFOR-it te Policia e Kosovës dhe as nuk përfaqëson tërheqje apo zvogëlim të angazhimit të NATO-s".

Vetë komanda e KFOR-it nuk e sheh këtë hap si shenjë qetësimi. Ajo e përshkruan situatën si "e brishtë", me "potencial për tensione të reja", veçanërisht në veri të Kosovës.