Ura e Ibrit dhe tërheqja e KFOR-it: Maqedonci akuzon Serbinë se po "fabrikon" krizë

Ripërshtatja e pranisë së KFOR-it te Ura mbi lumin Ibër — pika më e ndjeshme e ndarjes në veri të Kosovës — është kthyer në një përplasje narrativash mes Prishtinës dhe Beogradit. Ministri i Mbrojtjes së Kosovës, Ejup Maqedonci, e ka cilësuar këtë hap si dëshmi të përmirësimit të situatës së sigurisë, ndërsa ka akuzuar udhëheqjen e Serbisë se po përpiqet të krijojë artificialisht një krizë.

Përmes një postimi në Facebook, Maqedonci ka argumentuar se "optimizimi gradual" i pranisë së misionit ndërkombëtar nuk do të thotë më pak siguri për askënd. "Optimizimi gradual i pranisë së KFOR-it, përfshirë përshtatjen e pranisë në urën mbi Ibër, është para së gjithash reflektim i përmirësimit të situatës së sigurisë në Kosovë dhe i rritjes së kapaciteteve të institucioneve tona të sigurisë. Ky është një proces i bazuar në vlerësime profesionale të situatës në terren dhe nuk paraqet zvogëlim të sigurisë për asnjë qytetar apo komunitet në Republikën e Kosovës", ka shkruar ministri.

Sipas tij, Kosova ndër vite ka ndërtuar institucione profesionale të sigurisë, ndërsa koordinimi me KFOR-in dhe partnerët ndërkombëtarë vazhdon të jetë i ngushtë.

Reagimi ka ardhur pas deklaratave të udhëheqjes politike dhe ushtarake të Serbisë lidhur me zhvillimet e fundit rreth pranisë së KFOR-it. Maqedonci vlerëson se përpjekjet e lidershipit serb për ta paraqitur këtë ripërshtatje si kërcënim për komunitetin serb apo si provë të një situate të paqëndrueshme nuk përputhen me realitetin në terren. "Përkundrazi, ato synojnë të krijojnë perceptimin e një krize atje ku vlerësimet profesionale të sigurisë tregojnë progres", ka thënë ai.

Ministri e ka lidhur këtë narrativë edhe me disa zhvillime të tjera të fundit, duke pretenduar se qëllimi është largimi i vëmendjes nga çështje që, sipas tij, kërkojnë përgjegjësi. Ai përmendi gjetjet lidhur me varrezën masive në Kalludër, zbulimin e armëve dhe pajisjeve në lokacione të ndryshme në veri të Kosovës, si dhe veprimet e institucioneve të Kosovës kundër rrjeteve të dyshuara të inteligjencës së Serbisë dhe aktiviteteve subversive.

"Në vend të narrativave që prodhojnë frikë dhe tension, rajoni ynë ka nevojë për përgjegjësi, transparencë dhe respektim të fakteve. Republika e Kosovës nuk është burim i destabilitetit", ka shkruar Maqedonci.

Ministri theksoi se Kosova mbetet shtet demokratik dhe partner i besueshëm i Shteteve të Bashkuara të Amerikës, NATO-s dhe aleatëve të saj, si dhe kontribuuese në stabilitetin rajonal. Sipas tij, institucionet e vendit do të vazhdojnë të punojnë në koordinim të ngushtë me KFOR-in dhe partnerët strategjikë për ruajtjen e një mjedisi të sigurt për të gjithë qytetarët.

"Siguria dhe stabiliteti i qëndrueshëm ndërtohen mbi fakte, bashkëpunim dhe përgjegjësi institucionale – jo mbi dezinformim, narrativa të frikës dhe përpjekje për krijimin artificial të krizave", ka përfunduar ministri.