ReklamëHapësirë reklame
ReklamëHapësirë reklame
Reklamë
Autobotë të modifikuar, të mbushur me ujë deri në 90 për qind, kalonin si ngarkesa nafte drejt Kosovës, ndërsa karburanti i vërtetë mbetej për shitje në Shqipëri. Kështu e përshkruan Prokuroria Speciale skemën për të cilën akuzon 12 persona.
Cisterna që në letër mbanin naftë, por në fakt transportonin kryesisht ujë. Kjo është zemra e skemës për të cilën Prokuroria Speciale e Republikës së Kosovës ka ngritur aktakuzë në Gjykatën Themelore në Prishtinë ndaj 12 personave, të cilët, sipas prokurorisë, i shkaktuan buxhetit të shtetit një dëm prej 4.637.893,69 eurosh.
Të pandehurit, të identifikuar me inicialet F.M., F.M., K.V., F.V., S.K., N.B., D.M., A.M., M.M., N.M., G.Q. dhe S.M., akuzohen për "Pjesëmarrja ose organizimi i grupit kriminal të organizuar, lidhur me veprat penale “Mashtrimi” dhe “Shmangia nga tatimi”", si dhe për "Mbajtja në pronësi, kontroll ose posedim të paautorizuar të armëve", "Falsifikimi i parasë", "Përdorimi i armës apo mjetit të rrezikshëm" dhe "Shpëlarja e parave". Sipas aktakuzës, ata vepruan në bashkëpunim nga janari i vitit 2021 deri në dhjetor të vitit 2025.
Rruga e naftës nisej në Shqipëri. Sipas prokurorisë, njëri nga dy të pandehurit me inicialet F.M. ngriti një rrjet bashkëpunëtorësh brenda Kosovës dhe me shtetas shqiptarë, duke blerë derivate nafte nga kompania "G.O.G." SH.A në Shqipëri, me qëllim importimin e tyre në Kosovë. Gjatë rrugës, në shumicën e rasteve, mjetet transportuese dyshohet se zëvendësoheshin me autobotë të tjerë të modifikuar, të mbushur me ujë deri në 90 për qind të kapacitetit. Karburanti mbetej për t'u shitur në tregun shqiptar.
Për të funksionuar, skema kishte nevojë për cisterna të përshtatura. Aktakuza i ngarkon këtë rol të pandehurit G.Q., i cili akuzohet se ndërhyri në ndarjet e brendshme, tubacionet dhe kolektorët e autoboteve, duke mbyllur ose ndryshuar disa nga daljet origjinale. M.M. dyshohet se organizonte dhe mbikëqyrte transportin, përfshirë dërgimin e autoboteve për modifikim në një punëtori në Han të Elezit, ndërsa N.M. dyshohet se mori pjesë në transportimin e ngarkesave drejt pikës kufitare të Vërmicës, për t'iu shmangur kontrolleve doganore dhe për përfitim material.
Pas shkarkimit të naftës, sipas aktakuzës, të pandehurit i mbushnin mjetet me ujë dhe i shkarkonin në lokacione të ndryshme në Kosovë.
Ana tjetër e mashtrimit ishte në letra. Në përshkrimin e roleve, aktakuza përmend F.K. dhe K.V. si bashkëpunëtorë në importimin dhe deklarimin e derivateve, përfshirë deklarimin e ujit si naftë, lëshimin e faturave për mallra që pretendohet se nuk kanë ekzistuar dhe shmangien nga tatimi përmes bizneseve "E. P." SH.P.K. dhe "K. O." SH.P.K. Nuk është sqaruar ende lidhja mes F.K. dhe F.V., i cili figuron në listën e të pandehurve.
Përmes të njëjtit biznes, "E. P." SH.P.K., S.K. dyshohet se siguroi, lëshoi dhe pranoi fatura të dyshuara fiktive për shitblerjen e derivateve, me qëllim zvogëlimin e detyrimeve tatimore. N.B. dyshohet se përmes biznesit "S." SH.P.K. lëshoi fatura për transaksione të dyshuara fiktive dhe deklaroi blerje nafte që pretendohet se nuk kanë ndodhur. D.M. dyshohet se bashkëpunoi në importin dhe tregtimin e derivateve përmes bizneseve "V. P." SH.P.K. dhe "VEDV. G." SH.P.K., ndërsa A.M., sipas aktakuzës, siguroi ose pranoi fatura të dyshuara fiktive përmes biznesit "C. O." SH.P.K.
Në fund të zinxhirit qëndron pasuria. S.M. dyshohet se mbante në emër të tij pasuri të luajtshme dhe të paluajtshme, të cilat, sipas prokurorisë, janë përdorur ose financuar nga persona të tjerë të përfshirë në rast.
Tani fjalën e ka Gjykata Themelore në Prishtinë. Akuzat janë të prokurorisë dhe të pandehurit konsiderohen të pafajshëm derisa gjykata të vendosë ndryshe me vendim të formës së prerë.
Pas vitesh pritjeje, mosmarrëveshja për qindra miliona euro të paguara nga buxhetet komunale arriti në fazën e parë dëgjimore. Drejtori ekzekutiv i AKK-së, Sazan Ibrahimi, thotë se niveli qendror as që u paraqit.
