Ujërat e zeza rrjedhin prej muajsh në Bresje, banorët kërkojnë zgjidhje afatgjatë

Era e rëndë dhe ujërat e zeza që dalin në hapësirë të hapur janë bërë përditshmëri për banorët e rrugës “Bedri Pejani” në Bresje të Fushë Kosovës. Situata vazhdon prej disa muajsh dhe, sipas banorëve, nuk është vetëm çështje aromash: kalimi nëpër këtë pjesë është bërë i vështirë për qytetarët dhe për fëmijët.

Problemi ka arritur edhe në Kuvendin Komunal. Asamblisti i PDK-së në Fushë Kosovë, Valon Murseli, tha se çështja është ngritur te Drejtoria e Shërbimeve Publike dhe te KRU “Prishtina”. “Një çështje të cilën e kanë ngritur banorët është një problem që po vazhdon gjatë, ku dalin ujërat dhe kanalizimi në atë pjesë dhe qytetarët janë shumë të shqetësuar, sepse po u krijon shumë probleme”, deklaroi ai.

Murseli bëri të ditur se për këtë ka biseduar me drejtorin e Shërbimeve Publike, Izja Mjeku, dhe me drejtorin e Njësisë së KRU “Prishtina” për Fushë Kosovën. Sipas tij, në këtë pjesë është intervenuar disa herë, por banorët nuk kërkojnë më arna: ata duan që çështja të trajtohet me një projekt të veçantë dhe të zgjidhet në mënyrë afatgjatë.

Nga ana e tij, drejtori i Drejtorisë së Shërbimeve Publike, Izja Mjeku, pranoi se rruga ka probleme të theksuara. Ai tha se komuna ka ndërhyrë dy ose tri herë përmes kompanisë së kontraktuar, ndërsa ndërhyrje ka bërë edhe KRU “Prishtina”. “Jemi në fazën kur po analizohen projektet dhe me siguri një ndër prioritetet ose projektet e para do të jetë edhe kjo lagje, për arsye se ka probleme shumë të theksuara”, tha Mjeku.

Sipas tij, rrënja e problemit qëndron te infrastruktura: kanalizimet e ndërtuara në atë pjesë janë jashtë standardeve dhe rregullimi i tyre pritet të bëhet me kontraktimin e një kompanie. Afat konkret kohor për realizimin e projektit nuk është bërë i ditur.

Pas kërkesës së banorëve, KRU “Prishtina” ka intervenuar për pastrimin dhe hapjen e kanalit. Megjithatë, banorët thonë se problemi nuk është zgjidhur përfundimisht dhe kërkojnë që pas ndërhyrjeve të rregullohet edhe rruga, e cila është dëmtuar dhe po vështirëson qarkullimin.