Ujërat e zeza mbyllin liqenet e një parku në Nju Jork, kërkohet hetim

Tre liqene brenda një parku në Staten Island të Nju Jorkut nuk janë më të hapura për varkëtim dhe peshkim. Pas testimeve të kryera nga Departamenti i Parkeve dhe Rekreacionit, liqenet e parkut Clove Lakes u mbyllën, ndërsa banorët e zonës thonë se era e rëndë ndihet prej vitesh.

Kryetari i komunës së Staten Islandit, Vito Fossella, kërkon hetim për atë që përshkruan si një rrjedhje ujërash të zeza në liqenet e parkut. Sipas tij, tubacione të defektuara kanë derdhur pa ndërprerje ujëra të zeza të patrajtuara në një rrjet ujor të ndërlidhur. Brenda parkut, liqeni Clove lidhet përmes kanaleve ujore me liqenet Martling dhe Brooks.

Fossella e ngriti krahasimin me parkun më të njohur të qytetit: "Nëse kjo do të ishte Central Park dhe kjo do të ishte çështja, të kishim ujëra të zeza të patrajtuara në liqenin e Central Parkut, njerëzit do të çmendeshin, dhe me të drejtë", thotë ai.

Bashkë me drejtues të tjerë lokalë, ai kërkon krijimin e një task-force me agjencitë përkatëse shtetërore dhe lokale, për t'u përballur me atë që e cilësojnë si rrezik të qartë për shëndetin publik në parkun Clove Lakes.

Për banorët, problemi nuk është i ri. "Të gjitha lagjet, të gjitha komunitetet vijnë këtu për shesh lojërash, për shëtitje, për parqet", thotë Debra Altman, banore e zonës, e cila shpjegon se era e rëndë vazhdon prej vitesh. "Ka pasur herë që kam zbritur poshtë në liqen dhe mund të nuhatje sa keq ishin ujërat e zeza", thotë ajo.

Përgjegjësia dhe burimi i ndotjes mbeten të papërcaktuara. Një zëdhënës i Departamentit të Parkeve dhe Rekreacionit deklaroi: "NYC Parks nuk është në dijeni të ndonjë linje kanalizimi sanitar që rrjedh në liqenin Clove. Po koordinohemi me agjencitë përkatëse për hapat e mëtejshëm."

Ligjvënësit e Staten Islandit besojnë se zgjidhja është e thjeshtë. "Kjo nuk është shkencë raketore. Kjo është hidraulikë, për hir të Zotit", thotë senatori i shtetit, Andrew Lanza.

Të hënën, kur ligjvënësit bënë thirrjen për task-forcën, një zëdhënës i Departamentit të Mbrojtjes së Mjedisit të qytetit bëri të ditur se departamenti do të bëjë pjesë në të.

Ndërkohë, vizitorët kërkojnë vetëm një zgjidhje. "Staten Islandi meriton një park vërtet të mirë dhe ky është një park i mrekullueshëm, kështu që shpresoj se mund ta zgjidhin", thotë Delilah Atanasio, vizitore e parkut.