"UÇK, UÇK": Protesta e ditës së 109-të në Tiranë marshon drejt Kryeministrisë

Thirrjet "UÇK, UÇK" u ngritën mbi kolonën e protestuesve që këtë të mërkurë u nisën nga sheshi "Skënderbej" në Tiranë drejt Kryeministrisë. Ishte dita e 109-të e protestës së qytetarëve dhe aktivistëve në kryeqytetin shqiptar, por agjenda e ditës u ndërthurr me një zhvillim tjetër: shpalljen e vendimit të Gjykatës Speciale në Hagë ndaj ish-liderëve të UÇK-së.

Protestuesit u solidarizuan me ish-liderët gjatë marshimit, duke shndërruar një protestë me axhendë të brendshme në një shfaqje publike qëndrimi ndaj aktgjykimit të Hagës.

Në një moment, protestuesit tentuan të thyejnë kordonin policor të vendosur në rrugën e tyre. Më pas ata vazhduan qëndrimin para Qeverisë, ku situata raportohet e qetë.

Vendimi i Hagës ka nxjerrë reagime të shpejta edhe në Kosovë. Nasim Haradinaj kërkoi mbajtjen e mbledhjes së Kuvendit të Kosovës pas aktgjykimit, ndërsa Spiropali reagoi me qëndrimin se "Gjykata nuk mund ta rishkruajë si projekt kriminal luftën e një populli për liri". Maliqi u bëri thirrje liderëve politikë "të takohen urgjentisht e t'i japin orientim situatës". Kritika ka ardhur edhe ndaj Bashkimit Europian për qëndrimin e tij ndaj Speciales, nga ish-ambasadori holandez.