Uashingtoni zhvendos 52 milionë dollarë ndihmë ushtarake, preket edhe Maqedonia e Veriut

Paratë që ishin premtuar ushtrive të katër shteteve, dy prej tyre anëtare të NATO-s, po marrin rrugën drejt Amerikës Qendrore dhe Jugore. Departamenti i Shtetit i SHBA-së njoftoi të martën Kongresin se do të rialokojë 52 milionë dollarë nga fondet për financimin e ushtrive të huaja, shuma që fillimisht ishin ndarë për Sllovakinë, Maqedoninë e Veriut, Tunizinë dhe Irakun.

Destinacioni i ri i këtyre mjeteve janë Panamaja, Peruja, Ekuadori dhe Kolumbia, sipas Associated Press.

Lëvizja vjen pak ditë pasi sekretari amerikan i Shtetit, Marco Rubio, vizitoi javën e kaluar Kolumbinë, Ekuadorin dhe Perunë, ku u premtoi këtyre vendeve mbështetje shtesë.

Në total, administrata e presidentit amerikan Donald Trump po rialokon dhjetëra miliona dollarë nga fondet e ndihmës ushtarake të destinuara për disa vende të Evropës dhe Lindjes së Mesme, duke i zhvendosur drejt kontinentit amerikan. Kjo është një nga lëvizjet e fundit të Uashingtonit për reduktimin e fondeve ose zhvendosjen e trupave amerikane në Evropë, ndërkohë që Trump ka kritikuar vazhdimisht aleatët e NATO-s për shpenzimet e tyre në mbrojtje dhe për çështje të tjera.

Maqedonia e Veriut dhe Sllovakia janë të dyja anëtare të Aleancës.

Rialokimi i 52 milionë dollarëve nuk nënkupton ndërprerjen e financimit të ushtrive të huaja për Tunizinë, Irakun, Maqedoninë e Veriut apo Sllovakinë. Sa do të mbetet konkretisht për secilin prej këtyre katër shteteve nuk është bërë e qartë.