Sulm në aeroportin e Damamit lë një të vrarë, ndërsa SHBA tërheq stafin nga Riadi

Fluturimet u devijuan dhe aktiviteti u ndal në Aeroportin Ndërkombëtar Mbreti Fahd në Damam, në lindje të Arabisë Saudite, pasi një goditje e së mërkurës mbrëma la të paktën një të vrarë dhe tetë të plagosur. Bilancin e dha Autoriteti Saudit i Aviacionit Civil, i cili njoftoi në rrjetin X se po vlerësohet shtrirja e dëmeve materiale në aeroport.

Autoriteti nuk tregoi se kush qëndron pas sulmit, ndërsa rebelët hutitë të Jemenit, të mbështetur nga Irani, nuk e kanë marrë përsipër atë. Faqja e ndjekjes së fluturimeve Flightradar24 raportoi se fluturimet nga aeroporti po ridrejtoheshin drejt destinacioneve të tjera, ndërkohë që operacionet ishin ndalur.

Goditja në Damam erdhi pas një tjetër incidenti të rëndë po atë ditë. Më herët të mërkurën, Ministria Saudite e Energjisë njoftoi se forcat kishin rrëzuar me sukses një dron që synonte një objekt nafte, por mbetjet e tij që ranë në tokë vranë dy persona dhe plagosën dy të tjerë. Sipas ministrisë, viktimat ishin një shtetas filipinas dhe një shtetas nepalez.

Në Uashington, Departamenti amerikan i Shtetit reagoi duke urdhëruar largimin e një pjese të diplomatëve dhe të familjarëve të tyre nga mbretëria e Gjirit. Zëdhënësi i departamentit, Tommy Pigott, bëri të ditur se urdhri prek personelin jo thelbësor dhe anëtarët e familjeve në ambasadën e SHBA-së në Riad. "Hutitë e mbështetur nga Irani janë përfshirë gjithnjë e më shumë në armiqësi kundër Arabisë Saudite, përfshirë sulme ndaj aeroporteve civile dhe infrastrukturës tjetër kritike, që kanë shkaktuar viktima civile dhe ndërprerje të rënda të udhëtimeve", shkroi Pigott në X.

Agjencitë Reuters dhe AFP, duke cituar burime të paidentifikuara, raportuan se një urdhër i ngjashëm ishte lëshuar edhe për vende të tjera të Gjirit, ndërsa AFP përmendi Emiratet e Bashkuara Arabe, Jordaninë, Katarin dhe Bahreinin. Pigott i hodhi poshtë këto raportime si "të pasakta" dhe sqaroi se urdhri për largim vlen vetëm për punonjësit në Arabinë Saudite.

Nuk është hera e parë këtë vit që Uashingtoni merr një masë të tillë. Urdhra të ngjashëm evakuimi janë dhënë më shumë se një herë gjatë luftës me Iranin, kur Teherani goditi Arabinë Saudite si hakmarrje për luftën amerikano-izraelite kundër tij.

Pikërisht kjo luftë rrëzoi armëpushimin katërvjeçar mes Arabisë Saudite dhe rebelëve hutitë. Që atëherë konflikti i rindezur është përshkallëzuar në javët e fundit, me rebelët jemenas që kanë shënjestruar disa nga aeroportet kryesore saudite, ndërsa gjatë këtij muaji mbretëria ka përjetuar sulme pothuajse çdo ditë.