Uashingtoni i ofron Putinit takim ballë për ballë me Trumpin dhe Zelenskin

Shtetet e Bashkuara do t'i propozojnë presidentit rus, Vladimir Putin, bisedime të drejtpërdrejta me presidentin amerikan, Donald Trump, dhe me presidentin e Ukrainës, Volodimir Zelenski, në përpjekje për të arritur një armëpushim. Nëse do të realizohej, ky do të ishte samiti i parë i këtij lloji mes tre liderëve që kur Rusia nisi pushtimin në shkallë të plotë të Ukrainës në vitin 2022.

Oferta do të çohet personalisht në Rusi nga i dërguari i posaçëm i SHBA-së, Steve Witkoff, i cili niset të mërkurën për në Shën Petersburg. Plani u bë publik të martën në Oslo, në një konferencë për shtyp pas bisedimeve mes Zelenskit dhe Witkoffit në Norvegji.

Nikoqiri i takimit, kryeministri norvegjez Jonas Gahr Støre, tha se Witkoff do të paraqesë në Rusi propozime për kushtet e paqes, përfshirë idenë e një samiti me tre liderë. "Kemi pritur sot, do të thoja, bisedime të mira dhe konstruktive, të nevojshme pas ngjarjeve të javës së fundit", u tha Støre gazetarëve. Sipas tij, "Steve Witkoff do të fluturojë nesër për në Shën Petersburg, ku do të takohet me udhëheqjen ruse dhe do të shkëmbejë ide nga ky takim dhe propozimet mbi të cilat kanë punuar kolegët evropianë dhe amerikanë, dhe ndoshta do të hapë rrugën për një takim në nivel liderësh".

Takimi në kryeqytetin norvegjez erdhi pas disa ditësh tensionesh të larta mes Ukrainës dhe presidentit amerikan.

Zelenski e cilësoi ditën si pozitive, por vendosi edhe kufijtë e Kievit. Çështjet që lidhen me të ardhmen e territorit ukrainas, tha ai, mund të diskutohen vetëm nga liderët, ndërsa çdo marrëveshje paqeje do të kërkonte garanci sigurie të vërteta. Presidenti ukrainas theksoi se një marrëveshje do të ishte e pranueshme vetëm nëse Ukraina merr pjesë në hartimin e saj.

Rruga drejt një takimi të tillë nuk është e lehtë. Përpjekjet e mëparshme për ta ulur Putinin përballë Zelenskit kanë dështuar, ndërsa Kremlini ka këmbëngulur së fundmi se një takim i tillë mund të zhvillohej vetëm në Moskë.