Turisti portugez 20-vjeçar gjendet i vrarë në Ksamil, kërkohet autori i dyshuar

Një turist portugez 20-vjeçar është gjetur i vrarë gjatë orëve të natës pranë lokalit "Principotes" në Ksamil, në një ngjarje që ka tronditur zonën bregdetare. Viktima është identifikuar si Miguel Mendes.

Sipas të dhënave paraprake, i riu dyshohet se është qëlluar me një mjet prerës gjatë një konflikti të nisur për motive të dobëta. Si autor i dyshuar i ngjarjes kërkohet 29-vjeçari Sokrat Vata, shtetas shqiptar, i cili pas krimit u largua nga vendngjarja. Policia ka nisur kërkimet për kapjen e tij, ndërsa hetimet vijojnë për zbardhjen e plotë të rrethanave.

Emri i Vatës rezulton të jetë përmendur më herët në një çështje penale në Angli. Në vitin 2023 ai ishte shpallur fajtor për posedim të një arme sulmuese — konkretisht një përforcuesi metalik grushti — për posedim kokaine dhe për drejtim automjeti pa siguracion.

Sipas autoriteteve britanike, më 13 prill 2024, në Kent, Vata përmbysi një automjet të klonuar që po drejtonte pasi nuk iu bind urdhrit të policisë për të ndaluar në autostradën A20, në East Malling. Ai u largua nga vendngjarja, ndërsa brenda automjetit u gjetën disa qese me kokainë dhe targa.

Vetëm 17 ditë më vonë, më 30 prill 2024, ai u përfshi sërish në një ndjekje policore në Cambridge, duke drejtuar një Toyota RAV4 gri të raportuar të vjedhur. Pasi policia tentoi ta ndalonte, u largua me shpejtësi. Ndjekja vijoi nëpër disa rrugë të qytetit; Vata ndaloi për pak për të zbritur një pasagjer dhe më pas u drejtua nga Clara Rackham Road, ku iku me vrap dhe hodhi një pako me kokainë në një shkurre.

Policia e gjeti më vonë të fshehur në kopshtin e pasmë të një banese. Gjatë kontrollit atij iu gjetën 560 paund cash, ndërsa në automjet u zbuluan sërish targa. Vata rezultoi gjithashtu pozitiv për drejtim automjeti nën ndikimin e drogës.

Autoritetet shqiptare vijojnë hetimet dhe kërkimet për kapjen e 29-vjeçarit të dyshuar për vrasjen në Ksamil.