Tubim për Vuçiqin në Dragash? Deputeti i LVV-së akuzon Adem Hoxhën

Një tubim i së shtunës në komunën e Sharrit është shndërruar në përplasje të hapur politike. Deputeti i Lëvizjes Vetëvendosje, Filiz Mustafa, akuzon deputetin e Kuvendit të Kosovës Adem Hoxha se e organizoi atë në mbështetje të presidentit të Serbisë, Aleksandar Vuçiq, në prag të zgjedhjeve që do të mbahen në Serbi.

Akuzat Mustafa i bëri përmes një reagimi në Facebook, ku tubimin e vendosi në të njëjtin kontekst me deklaratat e Ivica Daçiqit, të cilin ai e cilëson si hegjemonist: "Të shtunën që shkoi, teksa hegjemonisti Ivica Daçiq shpaloste ëndrrat e tij hegjemoniste për t’u kthyer ‘një ditë’ në Prizren, në komunën e Sharrit, Adem Hoxha paska organizuar tubim në mbështetje të Aleksandar Vuçiqit, në prag të zgjedhjeve që do të mbahen në Serbi".

Sipas deputetit të LVV-së, Dragashi nuk duhet të bëhet vend për tubime që u shërbejnë interesave politike të Beogradit. Ai pretendon se në tubim u mblodhën qytetarë të komunitetit goran, të cilët, sipas tij, Hoxha i mban nën shantazh të vazhdueshëm.

Pjesa më e rëndë e reagimit u drejtohet zyrtarëve të qeverisjes lokale të kryetarit të Dragashit, Bexhet Xheladini. Mustafa thotë se në tubim ishin të pranishëm nënkryetari i komunës, Fejsal Haliloviç, tre drejtorë dhe një ish-drejtor komunal. Nga Xheladini ai kërkon masa ndaj tyre, duke theksuar se minimumi do të ishte shkarkimi. Megjithatë, Mustafa nuk pret që kjo të ndodhë, pasi, sipas tij, kryetari ka lidhur me ta marrëveshje për bashkëqeverisje.

Deputeti i Vetëvendosjes vuri në pikëpyetje edhe rolin e Hoxhës si përfaqësues i goranëve në Kuvend: "Adem Hoxha, si deputet i Kuvendit të Kosovës, duhet t’u përgjigjet qytetarëve: a është aty për t’i përfaqësuar denjësisht goranët e Sharrit, apo për të qenë zgjatim politik i Vuçiqit në Kosovë?".

Për Mustafën, vota e komunitetit goran duhet të shërbejë për përfaqësimin e interesave të qytetarëve dhe jo, siç e cilëson ai, për shërbimin ndaj Beogradit. Hoxha, Xheladini dhe zyrtarët e përmendur nuk janë dëgjuar ende lidhur me këto akuza.

"Sharri nuk është pronë e askujt. Goranët nuk janë vegla të politikave të huaja. Dhe Kosova nuk është tokë për ëndrrat hegjemoniste të askujt", e përmbylli reagimin e tij Mustafa.