Tuba metalike mbi shina, Holanda paralizohet nga një sabotim i dyshuar hekurudhor

Tuba metalike rreth 1,5 metra të gjatë, të lidhura mbi shina në disa pika të rrjetit hekurudhor holandez, mjaftuan për të paralizuar një pjesë të mirë të transportit në vend. Operatori i infrastrukturës hekurudhore, ProRail, njoftoi të martën se bëhet fjalë për një sabotim të dyshuar.

"Materials were found at multiple locations in the track that were deliberately placed there. This causes section malfunctions. Sabotage appears to be involved", thuhet në deklaratën e ProRail, që në shqip do të thotë: "Në disa vende në shina u gjetën materiale që ishin vendosur atje qëllimisht. Kjo shkakton defekte në sektorë. Duket se bëhet fjalë për sabotim". Në një deklaratë tjetër, ProRail e cilësoi ngjarjen si "an intentional disruption... caused by human action", pra "një ndërprerje e qëllimshme... e shkaktuar nga veprim njerëzor".

Pasojat u ndien menjëherë. Uebfaqja e rrjetit shënoi të paktën 15 ndërprerje në mbarë vendin gjatë së martës, duke përfshirë linjat drejt aeroportit kryesor ndërkombëtar, Schiphol, dhe drejt Utrehtit. Operatori i trenave Nederlandse Spoorwegen njoftoi se shërbimet rreth Zwolle-s, Deventerit dhe Amersfoortit ishin ndërprerë dhe se përmasat e problemit e bënin "not possible", të pamundur, ofrimin e autobusëve zëvendësues.

ProRail paralajmëroi udhëtarët në qendër dhe në veri të vendit të prisnin anulime dhe vonesa, ndërsa mbyllja e disa kalimeve në nivel rrezikonte të krijonte probleme edhe në rrugë. Një tren në qytetin e Steenwijkut goditi një nga objektet e vendosura mbi shina, por, sipas ProRail, askush nuk u lëndua.

Pamjet e publikuara nga transmetuesi publik holandez NOS treguan policë duke larguar nga binarët te Veenendaal, në qendër të Holandës, sende që dukeshin si tuba metalikë me gjatësi rreth 1,5 metra. Sipas ProRail, deri tani nuk është identifikuar asnjë i dyshuar dhe as motiv, ndërsa hetimin e ka marrë njësia kombëtare e policisë.

Të martën u vonua edhe një tren Eurostar nga Amsterdami për në Paris, për shkak të "operational restrictions", pra "kufizimeve operative" në stacionin Amsterdam Centraal. Nuk është e qartë nëse ky rast lidhet me ndërprerjet e tjera.

Ngjarja holandeze vjen pak ditë pas raportimeve në mediat franceze se një dalje treni nga shinat në Normandi, të premten, mund të ketë qenë akt sabotimi. Sipas prokurorisë, aksidentin mund ta ketë shkaktuar një pjesë shine e gjetur mbi binar. Ministri francez i Brendshëm, Laurent Nuñez, ka bërë thirrje për kujdes derisa hetimi është në vazhdim, duke thënë se autoritetet po ndjekin të gjitha pistat.

Në sfondin e këtyre incidenteve, kryeministrja e Danimarkës ka akuzuar Rusinë për sjellje "reckless", të pamatur. Kremlini ende nuk është përgjigjur.