Trump kërcënon sërish Omanin: “Do t’i bombardojmë” nëse pengon fundin e luftës me Iranin

Presidenti amerikan Donald Trump kërcënoi sërish se do të bombardojë Omanin nëse ky vend “ndërhyn” në përpjekjet e tij për t’i dhënë fund luftës mes SHBA-Izraelit dhe Iranit. “Nëse Omani ndërhyn, do t’i bombardojmë sa të mundemi,” tha Trump për Fox News të hënën. Është hera e dytë që kërcënime të tilla drejtohen ndaj Muskatit, një partneri strategjik të vjetër të Uashingtonit, që tradicionalisht ka shërbyer si kanal i fshehtë komunikimi mes SHBA-së dhe Teheranit.

Kërcënimi erdhi teksa presidenti amerikan përpiqet ta mbyllë konfliktin, gati gjashtë muaj pas nisjes së tij, dhe ndërsa dritarja diplomatike e rënë dakord me Teheranin skadoi pa asnjë marrëveshje përfundimtare në horizont. Megjithatë, Trump pohoi gjatë të njëjtës intervistë se “nuk është me ngut” për të arritur një marrëveshje.

Afati dymujor për një zgjidhje të negociuar u mbyll të hënën pa asnjë përparim. Trump ka pretenduar në mënyrë të përsëritur se lufta do të mbarojë “së shpejti”, duke folur muajt e fundit për mundësinë e një paqeje të qëndrueshme, por pa u konkretizuar asnjë kthesë e tillë.

Në të njëjtën intervistë, Trump tha se Irani duhet të “ngrejë flamurin e bardhë të dorëzimit”, por dha shenja se nuk do të vendoste një afat të ri për Teheranin. “Nuk kam asnjë orar. Nuk jam me ngut,” tha ai.

Kthesa më e re erdhi pas një memorandumi mirëkuptimi që Trump kishte nënshkruar me Iranin më 17 qershor, në Pallatin e Versajës, në kuadër të samitit të G7-ës. Ai memorandum kishte pezulluar armiqësitë dhe kishte vendosur një dritare maksimale prej 60 ditësh — të zgjatshme vetëm me pëlqim të ndërsjellë — që të dyja palët të arrinin një marrëveshje gjithëpërfshirëse mbi lehtësimin e sanksioneve, programin bërthamor iranian dhe mosmarrëveshje të tjera.

Trump hodhi poshtë edhe shqetësimet se arsenali i Uashingtonit po zbrazej pas gati gjashtë muajsh luftimesh, duke i thënë Fox News se ajo që SHBA ka shpenzuar deri tani kundër Iranit është “kacidhe”. Ai la të kuptohej se shumë prej municioneve më të përparuara amerikane, përfshirë sistemet e mbrojtjes ajrore, ishin “dhuruar” tashmë Ukrainës nën paraardhësin e tij, ish-presidentin Joe Biden — një pohim që përkon me paralajmërimet e analistëve të mbrojtjes më herët gjatë luftës, se rezervat amerikane dhe të aleatëve po shterreshin më shpejt sesa mund të rimbusheshin.

Në rrjetin e tij Truth Social, presidenti ripohoi vijën e tij të kuqe në negociata: “Qëllimi numër një është, dhe do të mbetet gjithmonë, që Irani të mos ketë, në asnjë mënyrë e formë, një armë bërthamore,” shkroi ai.

Kërcënimet ndaj Omanit lidhen ngushtë me ngërçin te Ngushtica e Hormuzit — një pikë kalimi vendimtare për tregtinë globale, nga ku zakonisht kalon rreth një e pesta e furnizimeve botërore të naftës me anije. Ngushtica ka mbetur praktikisht e mbyllur që kur SHBA dhe Izraeli nisën luftën kundër Iranit në shkurt. Irani ndodhet në veri të ngushticës, Omani në jug, dhe të dy vendet kanë qenë në bisedime për kontrollin e saj.