ReklamëHapësirë reklame
ReklamëHapësirë reklame
Reklamë
Presidenti amerikan Donald Trump tha se opsionet e vetme mbi tavolinë janë shkatërrimi i Iranit ose lënia e ekonomisë së tij të "kalbet", ndërsa ushtria iraniane paralajmëroi sulme "të dhimbshme" kundër interesave amerikane në Lindjen e Mesme. Përplasja vjen ditë para se delegacioni iranian të mbërrijë në Asamblenë e Përgjithshme të OKB-së në Nju-Jork.
Në prag të mbledhjes së liderëve botërorë në Nju-Jork, presidenti amerikan Donald Trump e ngriti presionin mbi Teheranin duke kërcënuar se do të shkatërrojë ekonominë e Iranit ose do të eliminojë udhëheqjen e tij, nëse nuk arrihet një marrëveshje.
Në një deklaratë për Fox News të dielën, Trump tha se opsionet e vetme mbi tavolinë janë "wiping Iran out" ("zhdukja e Iranit") ose lënia e ekonomisë së vendit të "rot" ("kalbet"), përveçse nëse të dyja palët arrijnë një marrëveshje. Në një bisedë telefonike me një gazetar të Fox News, ai u shpreh i gatshëm të takohej me presidentin iranian Masoud Pezeshkian gjatë Asamblesë, por shtoi se ndodhet në "deciding mode" ("fazë vendimmarrjeje") për atë nëse do ta godasë vendin.
Përgjigjja nga Teherani erdhi nga ushtria. Sipas Selisë Qendrore Khatam al-Anbia të Iranit, të dhënat e inteligjencës iraniane tregojnë se Shtetet e Bashkuara dhe aleatët e tyre po përgatisin një sulm të ri në shkallë të gjerë. "Nëse SHBA-ja bën ndonjë gabim kundër Republikës Islamike të Iranit, të gjitha pozicionet dhe interesat e saj në rajon do të shënjestrohen me sulme të vazhdueshme, efektive dhe të dhimbshme", u citua selia ushtarake nga mediumi gjysmëzyrtar Tasnim. Vendet e rajonit që do të mbështesnin një sulm të tillë, paralajmëroi ajo, do të trajtohen si palë në konflikt.
Përplasja shënon përshkallëzimin e fundit në një luftë që zgjat prej shtatë muajsh, pasi memorandumi i qershorit u shemb. Pavarësisht gjuhës së ashpër, një delegacion diplomatik i kryesuar nga presidenti Pezeshkian pritet të marrë pjesë këtë javë në Asamblenë e Përgjithshme të Kombeve të Bashkuara në Nju-Jork, ku, sipas Tasnim, ai do të zhvillojë takime me liderë shtetesh në margjinat e samitit.
Në Uashington, Departamenti amerikan i Shtetit lëshoi një alarm sigurie duke përmendur rreziqet e një përshkallëzimi të papritur në Lindjen e Mesme. Amerikanëve u kërkohet të rrisin vigjilencën dhe të jenë të përgatitur për anulime fluturimesh dhe mbyllje të hapësirës ajrore.
Paralajmërimet erdhën pas sulmeve me raketa dhe dronë që militantët hutitë, të mbështetur nga Irani, i rivendikuan të shtunën kundër Rijadit. Ishte alarmi i parë ajror në kryeqytetin saudit që nga përshkallëzimi i luftimeve në korrik. Autoritetet saudite njoftuan se përgjuan dhe shkatërruan një raketë balistike, pa viktima dhe pa dëme. Zëdhënësi i forcave të koalicionit të udhëhequr nga Arabia Saudite, gjeneralmajor Turki al-Maliki, shkroi të shtunën në platformën X se hutitë u përpoqën të godisnin edhe civilë dhe infrastrukturë në disa pjesë të mbretërisë, por se sulmet u bllokuan nga mbrojtja ajrore.
Tregjet e naftës kanë reaguar në drejtim të kundërt me armiqësitë. Çmimet janë tërhequr në ditët e fundit, teksa tregtarët shpresojnë për një rimëkëmbje të dërgesave energjetike nga Arabia Saudite: kontratat e ardhshme për naftën Brent ranë 1,7 për qind, në 102,15 dollarë për fuçi, ndërsa nafta amerikane West Texas Intermediate zbriti 1,8 për qind në 98,46 dollarë.
Kjo qetësi, sipas analistëve, nuk pritet të zgjasë. Në një shënim të shtunën, ekipi i analistëve të kompanisë së konsulencës Eurasia Group vlerësoi se çmimet e naftës do të mbeten të larta pavarësisht përparimit amerikan në kalimin e naftës përmes Ngushticës së Hormuzit, pasi çdo rikuperim i rrjedhave nuk do të mjaftonte për të mbuluar deficitin e përgjithshëm të tregut. Eurasia Group parashikon se Brenti do të tregtohet në brezin 90-110 dollarë për fuçi për pjesën e mbetur të këtij viti.
Ngushtica e Hormuzit mbetet leva kryesore e Teheranit. Irani ka këmbëngulur se nuk do ta rihapë atë derisa Uashingtoni të përmbushë angazhimet e marra në memorandumin e qershorit, i cili parashikonte heqjen e bllokadës detare ndaj porteve iraniane, lehtësimin e sanksioneve, shkrirjen e aseteve të ngrira iraniane dhe ndërprerjen e kërcënimeve ushtarake amerikane.
Në Teheran, linja zyrtare mbetet e dyfishtë. Kryetari i parlamentit iranian, Mohammad Bagher Ghalibaf, tha të dielën se Irani duhet të vazhdojë njëkohësisht të luftojë dhe të negociojë për t'i zmbrapsur armiqtë, dhe se duhet t'i përkushtohet diplomacisë vetëm kur të ketë epërsi në fushëbetejë.
Ministria e Mbrojtjes e Serbisë promovoi një dokumentar që lartëson korpusin e Prishtinës, njësinë dy komandantët e së cilës u dënuan në Hagë për krime lufte. Në premierën në Nish ishte i pranishëm edhe njëri prej tyre, Vlladimir Llazareviqi.
