Trump i kërkon Ukrainës të ndalë goditjet ndaj rafinerive ruse: "Po dëmton botën"

Në një pauzë gjatë shëtitjes nëpër fushën e tij të golfit në Doonbeg, në bregdetin perëndimor të Irlandës, presidenti amerikan Donald Trump u kërkoi të dielën gazetarëve vëmendje për një kërkesë drejtuar Kievit: Ukraina duhet të ndalë goditjet ndaj rafinerive ruse të naftës.

"Zoti Zelenski duhet të bëjë një gjë. Ai duhet të ndalë shkatërrimin e naftës së dizelit në Rusi", tha Trump. "Le të godasë objektiva të tjera, por jo naftën e dizelit, sepse po shkakton mungesë të dizelit."

Kërkesa vjen ndërsa çmimi i dizelit është rritur ndjeshëm në mbarë botën dhe të premten theu rekordin prej 6 dollarësh për galon në Shtetet e Bashkuara. I pyetur për këtë rritje, Trump këmbënguli se fajtore nuk është lufta që Uashingtoni nisi me Iranin më shumë se gjashtë muaj më parë, konflikt që ka kufizuar ndjeshëm dërgesat e naftës nga Lindja e Mesme.

"Kjo nuk është bërë nga Lindja e Mesme", tha ai. "Kjo është bërë nga ajo që po ndodh me Rusinë dhe Ukrainën. Prandaj folëm me zotin Zelenski për këtë. Ka plot objektiva të tjera. Mos e goditni naftën e dizelit, sepse ajo po dëmton botën." Sipas Trumpit, zyrtarë të administratës së tij i kanë kërkuar presidentit ukrainas Volodimir Zelenski të ndalë sulmet me dronë dhe raketa ndaj çdo objekti rus që prodhon dizel.

Pikërisht këto goditje, gjithnjë e më të thella brenda territorit rus, konsiderohen si një shtyllë e strategjisë ukrainase për ta bërë tepër të kushtueshme për Moskën pushtimin e plotë që ka hyrë në vitin e katërt.

Një zyrtar i lartë evropian, i njohur me bisedimet ndërmjetësuese të udhëhequra nga SHBA-ja mes Moskës dhe Kievit, e lidhi qëndrimin e Trumpit me zgjedhjet e mesmandatit të 3 nëntorit në Shtetet e Bashkuara, duke thënë se administrata po kërkon fajtorë. "Kjo administratë po e fajëson Ukrainën sepse nuk di çfarë të bëjë me luftën e vet [në Iran]", tha zyrtari, që foli për POLITICO pa u identifikuar. "Eksportet ruse të dizelit dhe naftës nuk kanë qenë kurrë domethënëse për konsumin amerikan. Vetë ideja është absurde. Për më tepër, të gjithë e kemi dëgjuar presidentin Trump të thotë se vetë Amerika mund të furnizojë sa naftë të dojë kushdo."

I njëjti zyrtar kërkoi që çdo armëpushim në sektorin energjetik të jetë i dyanshëm dhe që Uashingtoni ta bindë Moskën të ndalë goditjet ndaj rrjetit energjetik të Ukrainës. "Një armëpushim energjetik duhet të jetë i ndërsjellë", tha ai, duke shtuar: "Putini nuk e respekton këtë administratë [amerikane]. Prandaj nuk ka nisur një armëpushim."

Trumpi nuk është zyrtari i parë amerikan që ia atribuon çmimin e dizelit goditjeve ukrainase. Javën e kaluar, sekretari amerikan i Energjisë, Chris Wright, deklaroi për CBS-in se "situata me dizelin ka qenë sfiduese sepse rafineritë ruse kanë pësuar dëme të konsiderueshme". Disa ditë më parë, sekretari i Thesarit, Scott Bessent, tha në programin "Fox & Friends" se Amerika po përjeton "një tronditje energjetike", pjesërisht sepse "Ukraina ka vendosur se dëshiron t'i hedhë në erë asetet energjetike ruse dhe pronat e rafinuara".