Tri “Mercedes”-ë të vjedhur në Gjermani, të kapur në Tiranë: goditet rrjeti i makinave luksoze

Tri “Mercedes”-ë luksozë, të dyshuar se ishin vjedhur në Gjermani dhe të destinuar për t’u shitur në tregun shqiptar, janë sekuestruar në Tiranë. Vlera e tyre e përgjithshme kap shifrën e rreth 450 mijë eurove.

Sipas Policisë së Shtetit, sekuestrimi erdhi si rezultat i operacionit të koduar “Stolen line”, që synon të godasë trafikimin drejt Shqipërisë të automjeteve luksoze të vjedhura jashtë shtetit. Rasti u zbulua nga specialistët e Seksionit për Hetimin e Trafiqeve të Paligjshme.

Tri automjetet e bllokuara janë një “Mercedes Benz G-Class 63 AMG”, me vlerë rreth 200 mijë euro, një “Mercedes Benz GT 63 AMG”, me vlerë rreth 150 mijë euro, dhe një “Mercedes Benz S-Class 580e”, me vlerë rreth 100 mijë euro.

Në momentin e konstatimit, timonat e tyre i drejtonin tre shtetas, të cilët janë proceduar penalisht në gjendje të lirë: E. H., 41 vjeç, S. U., 27 vjeç, dhe K. B., 39 vjeç.

Për të njëjtin rast, policia ka identifikuar dhe shpallur në kërkim dy të tjerë, F. D., 24 vjeç, dhe K. V., 22 vjeç, të dyshuar se i kanë trafikuar automjetet në Shqipëri me qëllim shitjen e tyre.

Sipas policisë, po punohet për kapjen e dy personave në kërkim, për dokumentimin e plotë të veprimtarisë së dyshuar kriminale dhe për identifikimin e bashkëpunëtorëve të mundshëm. Materialet procedurale i janë referuar Prokurorisë për veprime të mëtejshme.