Trezori nën pishinë dhe 10 milionë euro mashtrim: kërkohet "shamania" nga Serbia

Nën pishinën e një vile luksoze në Austri, hetuesit gjetën një trezor të fshehtë: shufra ari, orë të shtrenjta, monedha dukat dhe sasi të mëdha parash në dorë. Bastisja ishte pjesa e dukshme e një skeme që, sipas dyshimeve të autoriteteve austriake, u zhvati qytetarëve në tri shtete mbi 10 milionë euro.

Gruaja në qendër të çështjes, Marijana Mijailoviq, 44-vjeçe, shtetase e Serbisë, e njohur si "shamania" e rreme "Amela", u largua para se policia t'i trokiste në derë. Prej një viti e gjysmë ajo i shmanget policisë evropiane. Për çdo informacion mbi të, policia austriake ka ofruar një shpërblim prej 5.000 eurosh.

Sipas dyshimeve, ajo paraqitej rrejshëm si fallxhore dhe merrte para, bizhuteri dhe ar nga njerëz në Austri, Gjermani dhe Zvicër. Viktimat i drejtoheshin në momente krizash jetësore, duke kërkuar shërim, shpëtim financiar ose heqjen e mallkimeve familjare. Ajo i bindte se paratë, arin dhe bizhuteritë e tyre i kishte "mallkuar" dikush dhe se u sillnin fatkeqësi e sëmundje. "Paraja jote është e mallkuar, të sjell sëmundje!", ishte mesazhi me të cilin punonte skema. Me pretekstin se mbi këto sende duhej të kryente rituale të ndërlikuara "pastrimi", ajo merrte shuma milionëshe, duke premtuar se do t'ua kthente gjithçka. Paratë dhe ari zhdukeshin pa gjurmë. Mes viktimave ka edhe një numër të konsiderueshëm njerëzish me origjinë nga Ballkani.

Familja e saj nuk arriti të largohej. Një gjykatë austriake ka nxjerrë para disa muajsh vendime të formës së prerë ndaj bashkëpunëtorëve më të afërt të saj. Kunata e saj e pranoi fajësinë dhe u dënua me katër vjet burg, ndërsa djali, Françesko, dhe ish-bashkëshorti u dënuan me nga tre vjet burg për mashtrim të rëndë komercial, pastrim parash dhe krijim të grupit kriminal.

Për të dëmtuarit, vendimi solli edhe një zhgënjim. Ndonëse dëmi i përgjithshëm u vlerësua mbi 10 milionë euro, gjykata urdhëroi kthimin e vetëm rreth 1,5 milionë eurove. Mbrojtja arriti të provonte se pjesa më e madhe e pasurisë milionëshe të sekuestruar rridhte nga punë të pretenduara të ligjshme me patundshmëri dhe nga trashëgimia, ndërsa prokuroria nuk mundi ta lidhte çdo euro drejtpërdrejt me qytetarët e mashtruar.

Policia austriake ka paralajmëruar publikun se e kërkuara është jashtëzakonisht e aftë në fshehjen e identitetit. Sipas të dhënave operative, ajo ka ndryshuar në mënyrë drastike pamjen: ngjyrën dhe gjatësinë e flokëve, stilin e veshjes, dhe me shumë gjasë përdor dokumente false për të lëvizur brenda zonës Shengen ose për t'u strehuar në territorin e Ballkanit. Shërbimet evropiane u bëjnë thirrje qytetarëve që e njohin fytyrën e saj nga fletarresti ose kanë të dhëna për lëvizjet e saj, të njoftojnë menjëherë stacionin më të afërt policor.