Tren udhëtarësh përplaset me një veturë në Lutogllavë të Pejës, një i lënduar

Një tren i udhëtarëve dhe një veturë janë përplasur mëngjesin e sotëm në fshatin Lutogllavë të Pejës. Sipas zëdhënësit të Policisë për Rajonin e Pejës, rasti është raportuar rreth orës 10:10.

Nga përplasja është lënduar një person, i cili u dërgua për trajtim mjekësor në Spitalin Rajonal të Pejës. "Personi i lënduar, sipas ekipit mjekësor, ka pësuar lëndime të lehta trupore", ka bërë të ditur zëdhënësi policor.

Si ndodhi aksidenti në vendkalimin mes hekurudhës dhe veturës mbetet ende e paqartë. Rastin e ka marrë në dorë Njësiti për Hetimin e Aksidenteve të Trafikut, i cili po heton për të zbardhur rrethanat dhe shkaqet e përplasjes.