Tre të vdekur nga rrëzimi i helikopterit mes dy ndërtesave në Los Anxhelos

Tre persona humbën jetën pasi një helikopter u rrëzua në periferi të Los Anxhelosit, njoftuan autoritetet zjarrfikëse të qytetit. Aparati ra mes dy ndërtesave tregtare në lagjen Chatsworth, sipas një zëdhënësi të Departamentit të Zjarrfikësve të Los Anxhelosit (LAFD).

Aksidenti ndodhi pak para orës 19:00 sipas kohës lokale të së martës, në zonën e rrugëve Lurline Avenue dhe Nordhoff Street. Një person u transferua në një spital lokal dhe gjendja e tij mbetet e panjohur.

Pamjet nga vendi i ngjarjes tregonin dy kontejnerë transporti dhe disa automjete në flakë. Zjarri është shuar, bëri të ditur departamenti i zjarrfikësve.

Kapiteni i LAFD-së, Branden Silverman, u tha gazetarëve të degës lokale të CBS-it: "Kemi një pacient të konfirmuar që dukej se ishte jashtë helikopterit kur ai u rrëzua". Sipas tij, "Ai person u shpall i vdekur në vendngjarje". Silverman nuk specifikoi se sa persona ndodheshin brenda helikopterit në momentin e rrëzimit.

Nuk u bë menjëherë e qartë se kush e operonte aparatin. Raportimet e mediave lokale sugjeruan se bëhej fjalë për një helikopter mediatik që fluturonte pranë vendit të një aksidenti fatal me autobus. Departamenti i Policisë së Los Anxhelosit konfirmoi se helikopteri nuk ishte i tyre.

Hetimin për incidentin do ta udhëheqë Bordi Kombëtar i Sigurisë së Transportit (NTSB).