Tre të maskuar hyjnë me forcë në një shtëpi në Viti, grushtojnë gruan dhe kërkojnë para

Ishte rreth orës 22:00 të mbrëmjes së së dielës kur tre persona të maskuar dyshohet se hynë me forcë në një shtëpi në fshatin Sodovinë e Qerkezëve të Vitisë. Brenda ishte një grua. Sipas deklarimit të saj në Polici, njëri prej tyre e goditi me grusht në fytyrë, ndërsa dy të tjerët nisën të kontrollonin dhomat në kërkim të parave.

Ngjarja ndodhi më 13 shtator dhe vetëm rreth dhjetë minuta më vonë, në orën 22:10, viktima, e identifikuar me inicialet F. M., e raportoi rastin në Polici. Sipas rrëfimit të saj, të tre të maskuarit dyshohet se kanë qenë të armatosur dhe që në momentin e parë kërkuan para.

Pas largimit të tyre u konstatua se, përveç demolimeve brenda shtëpisë, nuk vërehej të mungonte ndonjë send. Gruaja mori trajtim mjekësor për lëndimet e pësuara gjatë sulmit.

Në vendin e ngjarjes dolën menjëherë patrullat policore dhe Njësia e Hetimeve. Për shkak të seriozitetit të rastit, Stacioni Policor në Viti aktivizoi edhe masën e njohur si "Unaza e Çelikt", duke vendosur pika kontrolli në terren për t'i kapur tre të dyshuarit.

Pamjet e kamerave të sigurisë kanë regjistruar tre persona duke hyrë në shtëpi dhe më pas duke u larguar nga vendi i ngjarjes. Deri në këtë fazë nuk është identifikuar ndonjë veturë e dyshuar që mund të jetë përdorur për t'u larguar.

Për rastin është njoftuar Prokurori për Krime të Rënda dhe, pas konsultimit, është iniciuar rasti si "Grabitje në tentativë". Tre të dyshuarit mbeten të paidentifikuar, ndërsa hetimet dhe kërkimet për kapjen e tyre vazhdojnë.

Personat e dyshuar prezumohen të pafajshëm derisa fajësia të mos provohet me vendim të formës së prerë nga gjykata.