Tre të arrestuar për të shtënat në Strellc të Epërm: katër persona ishin në shënjestër

Katër persona ishin në shënjestër të të shtënave me armë zjarri që kumbuan mëngjesin e sotëm, rreth orës 5, në fshatin Strellc i Epërm të Deçanit. Askush prej tyre nuk mbeti i lënduar, ndërsa policia ka arrestuar tre burra të dyshuar për rastin.

Autorët ishin larguar nga vendi menjëherë pas incidentit, por ndjekja nuk zgjati shumë. Sipas policisë, të arrestuarit janë meshkuj madhorë, ndërsa është sekuestruar edhe arma që besohet se u përdor.

"Pas pranimit të njoftimit, njësitet policore kanë dalë menjëherë në vendin e ngjarjes dhe kanë ndërmarrë veprimet e nevojshme. Deri tani janë arrestuar tre persona të dyshuar, meshkuj, madhorë si dhe është sekuestruar një armë zjarri, pistoletë, për të cilën dyshohet se është përdorur në rast", deklaroi një toger i policisë.

Në vendin e ngjarjes, hetuesit gjetën dy predha. "Si pasojë e të shtënave nuk është raportuar për persona të lënduar", shtoi ai.

Rasti ka marrë tashmë cilësimin penal. "Në konsultim me prokurorin kompetent është iniciuar rast “Vrasje në tentativë”", tha zyrtari policor. Identiteti i të dyshuarve dhe motivi i sulmit nuk janë bërë publikë, ndërsa veprimet hetimore vazhdojnë për të zbardhur plotësisht rrethanat e ngjarjes.