Tragjedi në Treboviq të Pejës: vdes fëmija 3-vjeçar, dyshohet se e zuri dera e oborrit

Një fëmijë tre vjeç ka humbur jetën në fshatin Treboviq të Pejës. Sipas informacioneve fillestare, të voglin e ka zënë dera e oborrit të shtëpisë, ndonëse ky shkak ende nuk është konfirmuar zyrtarisht.

Alarmi për policinë erdhi nga spitali. Sipas Policisë Rajonale të Pejës, më 29 shtator 2026, rreth orës 09:30, Emergjenca e Spitalit Rajonal në Pejë njoftoi se aty ishte pranuar një fëmijë pa shenja jete.

"Njësitet policore menjëherë kanë dalë në vendin e ngjarjes, në fshatin Treboviq-Pejë, si dhe në Spitalin Rajonal në Pejë, me qëllim të sqarimit të rrethanave që kanë të bëjnë me rastin", tha zyrtari për informim i Policisë Rajonale të Pejës.

Për ngjarjen u njoftua Prokurori i Shtetit. Me urdhër të tij, trupi i pajetë i fëmijës iu dorëzua familjarëve për ceremoninë mortore.

Rrethanat e plota të vdekjes mbeten ende të pasqaruara dhe policia vazhdon punën për t'i zbardhur ato.