Tragjedi në Nigeri: Varka fundoset në lumë, dhjetëra viktima ndër to një 13-vjeçare

Dhjetëra njerëz humbën jetën kur një varkë u përmbys në një lumë në shtetin Sokoto, në veriperëndim të Nigerisë, sipas zyrtarëve dhe banorëve vendas. Varka dyshohet se po transportonte punëtorë që po shkonin drejt fermave në qytetin Gorau.

Ndërsa autoritetet nuk kanë dhënë ende një bilanc zyrtar viktimash, banorët flasin për një tragjedi masive. Sipas tyre, deri tani janë nxjerrë të paktën 46 trupa. Një dëshmitar i agjencisë Reuters pa 50 trupa — shumica të mbështjellë me rrogoza dhe pëlhura tradicionale — të vendosur në oborrin e një xhamie në Gorau, në pritje të varrimit.

"Situata është e keqe," tha Ibrahim Musa, ish-këshilltar në Gorau. "Ne kemi varrosur tashmë 46 trupa dhe pesë të tjerë sapo janë nxjerrë nga lumi."

Mes viktimave është edhe një 13-vjeçare. Banori Samaila Garba tha se mbesa e tij, Jamila Usman, ishte ndër të vdekurit. "E dini, gjatë stinës së shirave, shumica e grave dhe fëmijëve shkojnë në fermë për të punuar," tha ai.

Përmasat e humbjes duken të mëdha për komunitetin e vogël. Aminu Dan Hajiya, një tjetër banor, tregoi se ai vetë përdor të njëjtën rrugë ujore për të shkuar në fermën e tij dhe e quan veten me fat që nuk ndodhej në varkë atë ditë. "Në fakt, pothuajse çdo familje në komunitet është prekur," tha ai.

Operacionet e shpëtimit vijonin ende të enjten pranë Gorau, në zonën e qeverisjes lokale Goronyo. Dahir Kure, zëdhënës i Agjencisë Kombëtare për Menaxhimin e Emergjencave në shtet, tha se ekipet ishin në terren. "Tani jemi në vendin e aksidentit me varkë dhe kemi filluar punën e shpëtimit," tha ai, duke shtuar se autoritetet po vazhdonin "mbledhjen e informacionit të nevojshëm mbi ngjarjen" dhe nuk mund të jepnin menjëherë një bilanc.

Aksidentet me varka janë të shpeshta në Nigeri, ku dhjetëra njerëz mbyten çdo vit në lumenjtë dhe rrugët ujore, shpesh për shkak të mbingarkesës, mirëmbajtjes së dobët ose mosrespektimit të rregullave të sigurisë. Muajin e kaluar, një varkë tjetër u përmbys në shtetin Jigawa, ku u mbytën të paktën pesë persona. Në janar, të paktën 26 njerëz humbën jetën kur një varkë që transportonte fermerë dhe peshkatarë nga Jigawa drejt shtetit Yobe u fundos.