Tragjedi në Greqi: Kurti ngushëllon për avokaten Florida Hoxha dhe tre familjarët e saj

Avokatja shqiptaro-amerikane Florida Hoxha, bashkëshorti i saj Ian Kirkpatrick, vëllai i saj Florin Hoxha dhe kunata Eris Cani kanë humbur jetën në një aksident në Greqi. Lajmin e ka bërë publik kryeministri i Kosovës, Albin Kurti, i cili përmes një statusi ka shprehur pikëllimin për vdekjen tragjike të të katërve.

Sipas Kurtit, aksidenti ka ndodhur në fund të muajit që lamë pas. Si dhe ku saktësisht në Greqi ndodhi tragjedia nuk është bërë ende e ditur.

Në mesazhin e tij, kryeministri ka kujtuar takimin me Florida Hoxhën vitin e kaluar në New York, gjatë vizitës së tij zyrtare për Javën e Nivelit të Lartë të Asamblesë së Përgjithshme të Kombeve të Bashkuara. Ajo ishte ndër moderatoret e një bashkëbisedimi të organizuar nga rrjeti Albanian Professionals and Entrepreneurs Network (APEN), ku morën pjesë pjesëtarë të mërgatës shqiptare.

Kurti e ka përshkruar avokaten si "krenari e diasporës sonë dhe shtyllë e komunitetit dhe profesionit të saj". Edhe pse njohja mes tyre ishte e shkurtër, ai shkruan se cilësitë e saj binin menjëherë në sy: "Edhe në këtë kohë të shkurtër ishin të dukshme ato veçori që e kanë bërë Floridën kaq të dashur nga miqtë, kolegët dhe klientët e saj: optimizmi dhe idealizmi, respekti ndaj të gjithëve si njerëz të barabartë dhe një përkushtim për të ndërtuar ura të qëndrueshme midis mërgimtarëve tanë në SHBA dhe vendeve të tyre të origjinës".

Kryeministri ka vlerësuar kontributin e të katër të ndjerëve, duke i quajtur profesionistë të rinj që kishin arritur të jepnin shumë brenda një kohe të shkurtër dhe që synonin të bënin edhe më shumë në të ardhmen. "Florida, Ian, Florini dhe Erisi nuk janë më në mesin tonë. Kjo është një humbje e madhe për të gjithë ata që janë prekur nga këta katër profesionistë të rinj", ka shkruar Kurti, i cili e ka mbyllur mesazhin me ngushëllime për familjet dhe miqtë e viktimave.