Tragjedi në Detin e Javës: trageti me 243 persona përmbyset, 130 të zhdukur

Ora dy e natës. Kapiteni i tragetit "Virgo Transport 8" lëshon alarmin e fundit: anija është anuar rrezikshëm në njërin krah, nën goditjet e valëve dy metra e gjysmë të larta. Menjëherë pas kësaj, komunikimet ndërpriten. Në bord ishin 243 persona.

Trageti u përmbys në Detin e Javës, në Indonezi, i goditur nga një stuhi e fortë gjatë udhëtimit në linjën mes Surabajas dhe Borneos. Sipas Basarnas, agjencisë kombëtare indoneziane të kërkimit dhe shpëtimit, bilanci deri tani numëron të paktën gjashtë të vdekur dhe 130 të zhdukur. Ministri indonezian i Transportit, Dudy Purwagandhi, e konfirmoi përmbysjen e anijes orë të tëra pas tragjedisë.

Deri tani ekipet e shpëtimit kanë nxjerrë të gjallë 108 të mbijetuar, në një garë me kohën që zhvillohet në kushte atmosferike të papërballueshme. Rreziku nuk u kanoset vetëm të mbijetuarve, por edhe vetë mjeteve të shpëtimit. "Është jashtëzakonisht e rrezikshme për anijet. Edhe anija jonë Basarnas, e gjatë 40 metra, është në rrezik të rëndë", tha shefi lokal i skuadrave të kërkimit, I Putu Sudayana.

Pozicioni i fundit i regjistruar i tragetit, para se të humbnin kontaktet në orën 2:00 të mëngjesit të së dielës, ishte në Detin e Javës, rreth 150 kilometra larg destinacionit Banjarmasin, sipas shefit të autoritetit portual të Banjarmasinit, Heri Purwanto.

Për operacionin është ngritur një task-forcë e përbashkët mes agjencisë indoneziane të kërkim-shpëtimit, Marinës, policisë detare dhe palëve të tjera. Autoritetet lokale kanë ngritur një qendër komandimi në portin e Banjarmasinit, në provincën e Kalimantanit Jugor, ku janë vënë në gatishmëri paramedikë dhe ambulanca, ndërsa operacioneve iu bashkua edhe një helikopter i anijes së Basarnas. "Reaguam menjëherë ndaj njoftimit për aksidentin... Prioriteti ynë kryesor në këtë moment është siguria e të gjithë atyre që ndodhen në bord dhe po organizojmë një operacion të koordinuar shpëtimi", u tha nga pala zyrtare indoneziane.

Indonezia, arkipelag me mbi 17.000 ishuj, përballet rregullisht me aksidente detare, të nxitura nga kushtet e këqija të motit, mangësitë në kontrolle dhe standardet e pamjaftueshme të sigurisë. Të hënën e kaluar humbën gjurmët e një motoskafi me tetë persona në bord pranë vullkanit Anak Krakatau, në perëndim të Javës; pesë prej tyre ishin gazetarë që po ndiqnin erupsionin. Muajin e kaluar, një zjarr në bordin e një trageti që lidhte Balin me Lombokun shkaktoi vdekjen e një personi dhe zhdukjen e pesë të tjerëve.