Tragjedi mbi Egje: Çifti britanik në muajin e mjaltit dhe piloti vdesin në rrëzimin e helikopterit

Ata kishin zgjedhur ishullin e vogël grek të Sifnosit për të kaluar muajin e mjaltit. Në vend të kësaj, udhëtimi i çiftit të porsamartuar britanik përfundoi në një zjarr, pak metra nga vendi ku helikopteri duhej të ulej.

Marie Ebert, 30 vjeçe, dhe Alexander Cromie, 31 vjeç — të dy me banim në Londër — humbën jetën të hënën në mbrëmje së bashku me pilotin, kur helikopteri me të cilin udhëtonin ra në tokë dhe shpërtheu me përplasjen. "Mund të konfirmojmë se dy pasagjerët, Marie Ebert dhe Alexander Cromie, vdiqën në incidentin e së hënës në mbrëmje", tha një zyrtar policie.

Sipas policisë greke, shkaku i rrëzimit mund të ketë qenë një defekt mekanik. Të martën, autoritetet po përqendroheshin te "zhurma e çuditshme" që raportohet se lëshoi mjeti fluturues — një Bell 206 i marrë me qira privatisht — pak para se të binte në tokë. Zëvendëskryetari i bashkisë së Sifnosit, Manolis Fountolakis, i tha televizionit grek se banorët e zonës kanë dëshmuar për të njëjtën gjë: "Njerëzit në zonë kanë dëshmuar se dëgjuan helikopterin duke bërë një zhurmë, një zhurmë të çuditshme, ndoshta një defekt mekanik në ajër, sepse helika po bënte diçka të çuditshme."

Piloti u identifikua nga zyrtarët në Siros, qendra administrative e Egjeut, si Giorgos Raikos, 53 vjeç, ish-oficer i forcave ajrore, i cilësuar si "jashtëzakonisht i përvojshëm".

Fokusi i hetimit tashmë është te vetë mjeti. "Fokusi i hetimit tani është te helikopteri dhe mundësia e një defekti të motorit. Ajo që ka ndodhur është asgjë më pak se një tragjedi", tha një burim me njohuri të drejtpërdrejtë. Po studiohen edhe pamjet e kamerave të sigurisë, që tregojnë mjetin duke humbur kontrollin ndërsa i afrohej helioportit të ishullit pranë fshatit Eksambela.

Sa afër ishte katastrofa nga zona e banuar e dëshmon një banor vendas, Antonis Zambelis, i cituar nga transmetuesi publik grek ERT: "Helikopteri u rrëzua rreth 50 metra larg shtëpive me njerëz brenda dhe rreth 50 metra nga vendi i uljes, pranë manastirit Panagia tis Vrisis." Pas përplasjes, helikopteri u përfshi nga flakët dhe një tym i dendur mbuloi vendngjarjen. Punonjësit e shpëtimit që nxituan për të shuar zjarrin gjetën më pas mbetjet e të tre viktimave.

Kompania e menaxhimit të aktiveve Blackstone, ku Cromie punonte si nënkryetar në zgjidhjet e pasurisë private, konfirmoi humbjen e punonjësit të saj. "Jemi të tronditur nga humbja tragjike e tre personave, përfshirë kolegun tonë Alex Cromie dhe gruan e tij, Marie Ebert, të cilët po festonin muajin e mjaltit", thuhet në deklaratën e kompanisë. "Alex ishte i dashur nga të gjithë ata që e njihnin dhe punonin me të në Blackstone, dhe mendimet e lutjet tona janë me të dashurit e tij." Sipas profilit të tij në LinkedIn, Cromie kishte punuar në Blackstone për katër vjet, fillimisht si bashkëpunëtor dhe që nga janari i kaluar në pozicionin e nënkryetarit.