Trafiku rallohet në ngushticën e Hormuzit: vetëm shtatë anije brenda një dite

Vetëm shtatë anije që transportojnë lëndë të para kaluan të enjten përmes ngushticës së Hormuzit — sa gjysma e numrit të regjistruar një ditë më parë. Të dhënat vijnë nga shërbimi i gjurmimit të anijeve Kpler dhe pasqyrojnë shqetësimin për sigurinë e trafikut detar në Lindjen e Mesme, ndërkohë që bisedimet e paqes mes Shteteve të Bashkuara dhe Iranit vazhdojnë të mbeten pa lëvizje.

Nga gjithsej shtatë anijet, katër hynë në këtë rrugë detare dhe tri dolën prej saj. Deri para nisjes së luftës në shkurt, përmes ngushticës kalonte gati një e pesta e transportit botëror të naftës bruto dhe gazit natyror të lëngëzuar, sipas Reuters.

Mes shtatë mjeteve lundruese nuk kishte asnjë supertanker për naftë bruto e as tanker për gaz natyror të lëngëzuar. Të dhënat tregojnë megjithatë se një tanker shumë i madh gazi, që transportonte propan dhe butan, kaloi përmes Hormuzit duke ndjekur rutën iraniane.

Ngadalësimi preku edhe një pikë tjetër të nxehtë të lundrimit botëror. Trafiku përmes ngushticës së Bab el-Mandebit u ngadalësua të enjten krahasuar me dy ditët e mëparshme: gjithsej 23 anije me lëndë të para kaluan përmes saj, ndaj 34 anijeve në secilën nga dy ditët paraardhëse, sërish sipas të dhënave të Kpler. Prej tyre, 16 anije hynë në ngushticë dhe shtatë e lanë atë.

Mes shtatë anijeve që dolën nga Bab el-Mandebi ishin dy tankerë që transportonin naftë bruto me destinacion Vietnamin dhe Indinë. Ashtu si te Hormuzi, edhe këtu të enjten nuk kaloi asnjë supertanker për naftë bruto e as tanker për gaz natyror të lëngëzuar.