Tiranë: i kërkuari i operacionit "Shkolla të pastra" kapet me 235 doza kokainë dhe dy pistoleta

Ai ishte në kërkim për shitje droge pranë shkollave të Tiranës. Kur policia hyri në banesën e tij në rrugën "Rreshit Petrela", gjeti 363 gramë lëndë të dyshuar narkotike kokainë, të ndarë në 235 doza, dy pistoleta dhe municion luftarak.

I dyshuari, O. F., 28 vjeç, banues në Tiranë, u arrestua në flagrancë, njoftoi Policia e Shtetit. Sipas policisë, ai i mbante armët pa leje, ndërsa droga dyshohet se ishte e përgatitur për shitje. Në banesë u gjet edhe një peshore elektronike. Të gjitha sendet u sekuestruan.

Arrestimi është pjesë e vijimit të operacionit policor të koduar "Shkolla të pastra", i cili u zhvillua tre ditë më parë. Gjykata e Tiranës i kishte caktuar 28-vjeçarit masën e sigurisë "Arrest në burg" për veprën penale "Prodhimi dhe shitja e narkotikëve", por deri tani ai nuk ishte kapur.

Policia bën të ditur se gjurmët e tij u ndoqën përmes një informacioni të siguruar gjatë punës operative, sipas të cilit i kërkuari dyshohej se mbante në shtëpi armë zjarri dhe lëndë narkotike. Ndërhyrjen e organizuan shërbimet e Komisariatit të Policisë Nr. 3, në bashkëpunim me specialistët e Seksionit për Hetimin e Narkotikëve.

Hetimet vijojnë për të zbardhur dhe dokumentuar përfshirjen e 28-vjeçarit në veprimtari kriminale. Njëkohësisht, sipas policisë, punohet për kapjen e të gjithë personave të tjerë të shpallur në kërkim në kuadër të operacionit "Shkolla të pastra". Materialet procedurale iu referuan Prokurorisë për veprime të mëtejshme.